“Өнө мөнхийн молор эрдэнэ” тусгай үзэсгэлэнг Монголын үндэсний музейд өчигдөр нээлээ.
Тус музейн мэдээлснээр, үзэсгэлэнд сар шинийн баярыг угтан музейн сан хөмрөгийн цуглуулга болон “Мандала бурхан шашны төв”-ийн тэргүүн, “Монгол их цам” төслийн удирдагч, соёлын гавьяат зүтгэлтэн С.Батбаярын хувийн цуглуулгаас дээжлэн монголчуудын адууны соёлын бэлгэдэл, морин шүтээнийг цогцоор нь харуулж байна.
Үзэсгэлэнд адууны соёлд холбогдох бурхан шүтээн, шашны эд хэрэглэл, монгол зураг, баримал зэрэг урлагийн ховор нандин бүтээл, адуу малын тоног хэрэгсэл зэрэг 200 гаруй үзмэр дэлгэжээ. Адуу, морин шүтээн, бэлгэдлийн уялдаа холбоог сэдэвчилсэн, цогц байдлаар хүргэхийг зорьж буйгаараа онцлог юм.
Сар шинийн баярын өдрүүдэд гэр бүл, хүүхэд багачууд, судлаачид, гадаад дотоодын жуулчдад зориулсан соёлын ач холбогдол бүхий тусгай үзэсгэлэн юм.
“Өнө мөнхийн молор эрдэнэ” үзэсгэлэнгээс монголчуудын адуутай холбоотой шүтлэгийн уламжлал, бэлгэдлийн сэтгэлгээг нэгэн дор цогцоор нь мэдрэх боломжтой.
Уг үзэсгэлэн гуравдугаар сарын 1-нийг хүртэл үргэлжлэх аж.
