Төв аймгийн Баян сумын Хангайн булаг хэмээх газарт НТ VI-VIII дугаар зууны үед хамаарах Хангайн булгийн хүн чулуу бий.
Энэхүү дурсгалыг БСШУС-ын сайдын 161 дүгээр тушаалаар 2020 оны 3 дугаар сард аймгийн хамгаалалтад авчээ. Сумын төвөөс баруун хойд зүгт 25 км зайд хатан, гоёны хэмээн нэрийдсэн хоёр хүн чулуун дурсгал бий. Энэ хөшөө нь 93 см өндөр, хар өнгийн боржин чулуугаар эрэгтэй хүний цээж болон толгойн хэсэг, нүд, хөмсөг, хамар, ам болон сахал, хоёр чих, гарын хуруунууд зэргийг болхидуу байдлаар цоолборлож дүрсэлсэн байна.
Зүүн энгэртээ барьсан хундага нь эртний язгууртан хүний шинжийг илтгэж байна. Үүнээс 14 метрийн зайд эмэгтэй хүнийг дүрсэлсэн хүн чулуу оршиж, хоёр гартаа хундагыг цээжиндээ барьсан байдлаар бүтээжээ. Нүүрний хэсэг нь тод бөгөөд баруун хөмсгийг нүдний уртаас илүү гарган дүрсэлжээ.
Эх сурвалж: Төв аймгийн музей
