Соёл, спорт, аялал жуулчлал, залуучуудын яамны дэд сайд Г.Дашням ОХУ-ын Соёлын дэд сайд Андрей Владимирович Малышевтэй Москва хотноо /2026.02.11/ уулзлаа.
ССАЖЗЯ-ны мэдээлснээр, уулзалтаар дэд сайд Г.Дашням, дэд сайд А.В.Малышевт хоёр орны уран бүтээлчдэд соёл, урлагийн үйл ажиллагаанд харилцан оролцоход бүх талын дэмжлэг үзүүлдэгт талархал илэрхийлж, ОХУ-д соёл, урлагийн чиглэлээр их, дээд сургуульд суралцах хүсэлтэй монгол оюутнуудад олгодог ОХУ-ын Засгийн газрын тэтгэлгийн тоог нэмэгдүүлэх хүсэлтэй буйгаа илэрхийлэв.
Талууд хоёр орны соёл, урлагийн байгууллагууд шууд холбоо тогтоож, хамтран ажиллах тухай эрх зүйн баримт бичгүүд байгуулан хамтын ажиллагаагаа өргөжүүлж буйг онцолж, Монгол Улсад босоо ятга /арфа/ заах мэргэжлийн багш сэлгэн ажиллуулж, манай улсад нэн дутагдалтай байгаа энэ чиглэлээр боловсон хүчин бэлтгэх, олон улсын стандарт бүхий Urtext /Уртекст/ нотыг монголын мэргэжлийн урлагийн байгууллагууд, хөгжмийн боловсролын сургуулиудад нэвтрүүлэх, ОХУ-д тоглож байсан Монголын хөгжмийн зохиолчдын хэвлэмэл, гар бичмэл нот болон партитурыг Монгол Улсад авчрах боломжийн талаар санал солилцов.
Мөн Улсын дуурь бүжгийн эрдмийн театрыг хүчитгэх ажлын хүрээнд уг барилгыг сэргээн засварлах чиглэлээр ОХУ-ын холбогдох байгууллагатай хамтран ажиллах боломжийг судлах зэрэг асуудлыг хэлэлцэв.
