Миний хүсэл мөрөөдлийн жагсаалт бирдтэй уулзахаас эхлэж байна даа
Магадгүй та намайг тэнэг гэж бодож болох л юм
Хүүхэд байхаасаа л би түүнийг хүсэн хүлээдэг байлаа
Хэлэх үгс, шивнэх хүслээ одоо ч мартаагүй л явна даа.
Эхлээд би эмэгтэй хүний биед хувирч ороод
Эр хүнийг дотроосоо мэдэрнэ тэгээд
Зүрхэн дотор минь зүрх цохилохыг
Зүрх сэтгэлээрээ сонсно доо.
…Хамгийн их хүсдэг нь
Цаг хугацаагаар зугаалж орон зайгаар зорчих
Цаг бүхэнд амьдарч түүхэн үеийг биеэр үзэх…
…Ялалтын тухай сүр хүчит илтгэлийг догдлон хүлээх олонд
Яг тэр индэр дээрээс Гитлерийн оронд тавиад л…
…Бүрхэг Санкт Петэрбүргийн сүүн гэрэлт цагаан шөнийг нэг үзчихээд
Бүрхэг шөнөөр Бирмүүдийн арал руу би ганцаар аялалд яваад л
Боомтоос жижигхэн завь хөлсөлж аваад задгай тэнгист гараад л
Боломж нь ирэхээр ор сураггүй, учир битүүлгээр замахраад л…
…Үүлэн дээгүүр алхсаар диваажингийн үүдэнд очино
Үүрд нойрссон аавтайгаа ахин нэг уулзна
Тэндээс ниссээр саран дээр очно
Тэгээд нар жаргахыг ажна. /Саран дээрээс/
Яг л өндөр байшингийн оройгоос нүдээ аниад үсрэх шиг
Сарнаас дэлхий рүү унана
Агаарт алхаж үзээд төрөх сэтгэгдлийг нь харин
Амьдаар нь Нирвана амплагед 1994-ийг үзчихээд бичнэ…
Ямар байна даа?
…Ертөнцийн хамгийн сүүлчийн хүнийг үхэхэд би дэргэд нь байлцна
Ер бусын ганцаардал тэгэхэд надад мэдрэгднэ байх
Хүнгүй оршуулгийн ёслол ганцаар үйлдчихээд би улаан дарс шилээр нь ууна
Хүн төрөлхтний сүүлч гэж хүндлээд эцсийн шүлгээ согтуу уншина
Тэгээд яг тэнд би амиа хорлоно…
… Өөр би юу хүсдэг билээ байз?
Өө тийм мартах
Энэ олох хүслээс минь магад биелэх нь ганц үхэх
Эсвэл мартах л байх шив дээ
Мартах!
Миний мөрөөдөл хүслийн жагсаалт
Мартахаар дуусч байна даа
Мартах!
www.URLAG.mn
