Галт уулын дэлбэрэлтэд сүйрсэн эртний Ромын Помпей хотыг судалдаг археологичид энэхүү гамшгийн нэг хохирогчийн царай төрхийг анх удаа хиймэл оюуны технологи ашиглан сэргээснээ дижитал зураг хэлбэрээр үзүүлжээ.
Дижитал зургийн эзэн нь галт уулын дэлбэрэлтийн үеэр хотоос гарахаар зугтаж явахдаа амиа алдсан хоёр хохирогчийн нэг болох ахимаг насны эр юм байна. Нурангид дарагдаж үхсэн тэдний араг ясны үлдэгдлийг археологичид малтлагын үеэр илрүүлж байжээ.
Энэхүү сэргээн босгох ажлыг Помпей хотын Археологийн хүрээлэн, Падовагийн Их сургуультай хамтран гүйцэтгэсэн юм байна.
Юнескогийн дэлхийн өвд бүртгэлтэй Помпейн хот нь одоогоос бараг 2,000 жилийн өмнө Везувий галт уулын дэлбэрэлтээс үүссэн үнс нурманд булшлагдсан бөгөөд хотын барилга байгууламжууд, оршин суугчдын үлдэгдэл гайхалтай сайн хадгалагдсан байдаг.
Тухайн хохирогчийн гарт барилгын зуурмагийн сав байсан нь тэнгэрээс унах чулуун борооноос толгойгоо хамгаалах зорилготой байсан гэж таамаглажээ.
Эртний Ромын сурвалж бичгүүдэд галт уулын дэлбэрэлтийн үеэр хүмүүс толгойгоо хамгаалахын тулд янз бүрийн эд зүйлс ашиглаж байсныг дурдсан байдаг.
Тухайн хохирогч зугтахдаа бас тосон дэнлүү, жижиг төмөр бөгж, 10 хүрэл зоос зэрэг хувийн эд зүйлсээ авч явсан байна.
Дижитал хөргийг бүтээхдээ араг яс болон археологийн олдворыг бодит хүний дүр төрх болгон хөрвүүлэх зорилготой хиймэл оюуны технологид суурилсан системийг ашиглажээ.
“Археологийн асар их мэдээллийн санг одоо бид хиймэл оюуны тусламжтайгаар хамгаалж, сайжруулах боломжтой болж байна. Хэрвээ сайн ашиглаж чадвал уламжлалт аргаар хийсэн судалгаануудыг шинэчлэх боломж нээгдэнэ” гэж Помпейн Археологийн Хүрээлэнгийн захирал Габриэл Зуктригель хэлж байна.
Тэрбээр шинэ төсөл нь археологийн шинжлэх ухааныг олон нийтэд илүү хүртээмжтэй, сонирхолтой болгох ач холбогдолтойг онцолжээ.
