Өчигдөр буюу пүрэв гараг /2026.05.07/-т “Toyota Motor” компани “Lexus” брэндийн анхны гурван эгнээ суудалтай цахилгаан автомашин болох TZ загварыг танилцуулжээ.
Ирэх өвөл Японы зах зээлд худалдаанд гарах уг загвар нь гэр бүлийн зориулалттай SUV ангиллын автомашин юм байна.
Айчи мужийн Шимояама дахь Тоёотагийн Техникийн Төвд болсон танилцуулгын үеэр тус компани энэ шинэ бүтээгдэхүүнээ цаашид Умард Америк, Европ, Хятадын зах зээлд гаргахаар төлөвлөж байгааг мэдээлжээ.
TZ бүрэн цахилгаан хөдөлгүүрт автомашины үнийн мэдээллийг сүүлд зарлах юм байна.
“TZ нь цахилгаанжсан тансаг хэрэглээний шинэ стандартыг тогтоож байгаа юм. Цахилгаан хөдөлгүүрийн дуу чимээгүй байдал нь бөх бат араг бүтэцтэй хосолсноор өндөр хяналттай өвөрмөц акустик орчныг бүрдүүлж байна” гэж Toyota компанийн дизайн хариуцсан үйл ажиллагааны захирал Саймон Хамфрис танилцуулгын үеэр хэлжээ.
Японы зах зээлд гарах хувилбар нь нэг бүрэн цэнэглэлтээр 620 км зам туулах чадвартай бөгөөд 11 өнгөний сонголттой байх гэнэ.
