Монгол нүүдэлчдийн өв соёл, ёс заншлыг хойч үедээ өвлүүлэн үлдээх, хадгалах, хамгаалах, түгээн дэлгэрүүлэх, үзмэр бүтээлийг эрдэм шинжилгээ судалгааны эргэлтэд оруулах болон соёлын өвийг орон нутагт сурталчлан таниулах ажлын хүрээнд “Монголын нэг өдөр” нүүдлийн үзэсгэлэнг Орхон аймгийн музейн үзэсгэлэнгийн танхимд зохион байгуулж байна.
Уг үзэсгэлэнд Г.Занабазарын нэрэмжит Дүрслэх урлагийн музейн 1995 онд Засгийн газрын 241 дүгээр тогтоолоор Монгол улсын түүх соёлын хосгүй үнэт дурсгалт зүйлийн зэрэглэлд бүртгэгдсэн олноо Марзан хэмээн алдаршсан зураач Балдуугийн Шаравын “Монголын нэг өдөр” бүтээлийн хуулбар зургийг дэлгэн үзүүлж байна.
Нээлтийн үйл ажиллагаанд Орхон аймгийн Соёл урлаг, аялал жуулчлал, залуучуудын газрын дарга Д.Бэхбилэг, Орхон аймгийн музейн захирал Ч.Энхтуяа, Зураач, урчуудын холбооны тэргүүн, Үйлчилгээний Гавьяат ажилтан Д.Батбилэг, Монголын марк цуглуулагчдын холбооны Эрдэнэт хотын салбарын тэргүүн Б.Мажинбуу болон Орхон аймгийн Соёл урлагийн байгууллагын удирдлага, албан хаагчид, Эрдэнэт хотын иргэд оролцлоо.
Тус үзэсгэлэнд “Монголын нэг өдөр” бүтээлийн зарим нэг өгүүлэмж, дүр дүрслэлийг орчин үеийн гэрэл зургийн хальсанд хэрхэн буусныг МОНЦАМЭ агентлагийн гэрэл зурагчин Б.Чадраабалын авсан гэрэл зураг болон уг бүтээлд нийт хэчнээн тооны дүр дүрслэл, хэдэн хүн, мал, адгуус амьтад, угсаатны зүйн эд өлгийн зүйлс, зан үйл, тоо баримт зэрэг харьцуулсан судалгаатай танилцах болно.
Мөн орчин үеийн техник технологи ашиглаж хийсэн анимэйшн болон AR төхөөрөмжийн тусламжтай бүтээлийн дэлгэрэнгүй мэдээлэл авахын зэрэгцээ хүүхэд багачуудад зориулсан боловсролын хөтөлбөрийг тус тус хэрэгжүүлж байна.
