Дэлхийн хүүхдийн номын хамгийн том баяр болох “NamBook фестиваль” тавдугаар сарын 1-нээс 17-ны өдрүүдэд Өмнөд Солонгос улсын Нами арал дээр амжилттай зохион байгуулагдаж байна. Энэ жилийн арга хэмжээний хувьд “Сэтгэлийн уян мэдрэмж” сэдвийн дор хүний сэтгэл хөдлөл, уран сэтгэмжийг байгаль, ном, урлагаар дамжуулан илэрхийлж байгаагаараа онцлогтой.
Тэгвэл тус арга хэмжээнд Монгол Улсын соёлын төлөөлөгчид албан ёсоор оролцож, хоёр орны соёлын харилцаанд үнэтэй хувь нэмэр оруулах, үйл хэргийг улам бататгах талаар санал солилцжээ. 2007 оноос хойш Үндэсний номын баярыг зохион байгуулж ирсэн “Номын соёлт ертөнц” ТББ, “Либро сувд” агентлагын тэргүүн Б.Сувд монгол ахуй, нүүдэлчин соёл, хүүхдийн уран сэтгэмжийг баялаг ертөнцийн илтгэсэн агуулга бүхий шилдэг зурагт номын дээжсээс бүрдсэн олон арван бүтээлийг Нами арал дахь номын салбарынханд хүргэсэн байна.
Мөнхүү хамтын ажиллагааны хүрээнд Нами арал дахь дэлхийд алдартай Андерсений төвд монгол хүүхдийн номын тусгайлсан булан байгуулах, Монголын зурагт номын зураачдыг дараагийн “Nami Concours” уралдаанд оролцуулах, олон улсад гаргах зэргээр харилцан зөвшилцөж, санал сэтгэгдлээ хүргэсэн аж. Мөнхүү ирэх есдүгээр сард болох 40 дэх удаагийн “Үндэсний номын баяр”-т Нами арлын төлөөлөгчид, Өмнөд Солонгосын хэвлэлийн салбарынхныг урьж оролцуулахаар урилга гардуулжээ.
Номоор дамжсан соёлын нөхөрлөл бүтээдэг Нами арал нь НҮБ-аас Азийн анхны “Хүүхдэд ээлтэй сэдэвчилсэн парк”-аар нэрлэгдсэн юм. Тиймдээ хүүхдийн төсөөллийг хөгжүүлэх дэлхийн төв цэг хэмээн тодотгодог. Энд зохион байгуулагдаж буй “Bookcation”, “Book Camp” зэрэг шинэлэг хөтөлбөрүүд нь аялал болон уншлагын соёлыг гайхалтай хослуулж чаддагаараа алдартай. Хүүхдийн гар дээрх жижигхэн зурагт ном заримдаа улс орнуудыг холбосон хамгийн том соёлын гүүр болдог. Нами арал дахь хус моддын дунд эхэлсэн энэхүү нөхөрлөл Монгол, Солонгосын хүүхэд залуусыг номоор дамжуулан ойртуулж, шинэ үеийн соёлын хамтын ажиллагааны гэгээлэг түүхийг бичиж эхлэх нь зайлшгүй.
