2024 оны Дэлхийн аваргын тэмцээний финалын тайзнаа толилуулсан “Star” хамтлагийн “Spirit of Mongolia” бүжгийн үзүүлбэр YouTube платформ дээр 15 сая гаруй хандалт авч, дэлхийн олон орны үзэгчдийн хүртээл болж, “Dance Sport Total” суваг дээрх хамгийн олон үзэлттэй видео болжээ.
Энэхүү бүтээл нь зөвхөн тэмцээнд зориулан бүтээсэн үзүүлбэр байгаагүй бөгөөд Монгол хүний оюун санаа, үндэсний бахархал, тамирчдын ур чадвар, эрч хүч, хийморь сүлдийг дэлхийн тайзнаа илэрхийлсэн бүтээл гэдгээгээ онцлог.
Тус бүжгийн дэглэлт дээр бүжиг дэглээч Д.Батсайхан, Н.Онондарь нар ажиллаж, Монголын өв соёл, орчин үеийн хөдөлгөөний шийдлийг уялдуулан дэлхийн тайзнаа амжилттай хүргэсэн билээ.
Мөн Монгол хүний дэглэлттэй энэхүү бүтээл дэлхийн хэмжээний бүжгийн спортын тайзнаа Герман, Австри, Голландын шилдэг дэглээчдийн бүтээлүүдийн дараа үнэлэгдэж байгаа нь Монголын бүжгийн урлаг, Монгол уран бүтээлчид дэлхийн шилдгүүдийн эгнээнд албан ёсоор үнэлэгдэж буйн тод илэрхийлэл болж байна.
“Dance Sport Total” суваг дээрх хамгийн олон үзэлттэй видео болсон нь Монголын бүжгийн спорт, Монгол хүүхдүүдийн хөдөлмөр, авьяас чадварыг дэлхий нийт үнэлж байгаагийн тод илэрхийлэл. Star хамтлаг цаашид ч Монголын нэрийг дэлхийн тайзнаа өндөрт өргөсөн, илүү чанартай, илүү сэтгэл хөдөлгөм бүтээлүүдийг үзэгчиддээ хүргэсээр байх болно гэдгээ өөрсдийн цахим хуудсаараа дамжуулан илэрхийлжээ.
