Сэлэнгэ аймгийн Нэгдсэн музейгээс хүүхэд багачуудын үндэсний өв соёлын талаарх мэдлэг ойлголтыг нэмэгдүүлэх, монголчуудын уламжлалт сууц болох монгол гэрийн бүтэц, зохион байгуулалт, өвөрмөц онцлогийг таниулах зорилгоор “Монгол гэр” сэдэвт боловсрол, танин мэдэхүйн ажлыг зохион байгуулж байна.
Энэ хүрээнд хүүхдүүдэд монгол гэрийн үүсэл хөгжил, нүүдэлчин ахуй амьдралд гүйцэтгэх үүрэг, олон зуун жилийн турш уламжлагдан ирсэн монголчуудын ахуй соёл, байгальтай зохицон амьдрах ухааны талаар сонирхолтой мэдээллийг хүргэж байгаа юм.
Мөн гэрийн үндсэн бүтцүүд болох тооно, унь, хана, багана, хаалга, туурга, өрх зэрэг эд ангиудын нэршил, зориулалт, харилцан уялдаа холбоог тайлбарлан танилцуулж, монгол гэрийн бүтэц нь уур амьсгалын онцлогт зохицсон, задлан угсрахад хялбар, нүүдлийн соёл иргэншлийн үнэт өв болохыг онцлон тайлбарлаж байна.
Түүнчлэн гэр доторх эд зүйлсийн байрлал, зочин хүндэтгэх ёс, гал голомтоо дээдлэх уламжлал зэрэг монголчуудын ахуйн соёл, зан заншлын талаар хүүхэд багачуудтай харилцан ярилцаж, тэдний сонирхсон асуултад хариулав.
Монгол гэр нь зөвхөн орон сууц төдийгүй монголчуудын амьдралын хэв маяг, ертөнцийг үзэх үзэл, уламжлалт мэдлэг ухааны илэрхийлэл бөгөөд 2013 онд Монгол гэр барих уламжлалт урлал, түүнтэй холбоотой зан үйл нь ЮНЕСКО-гийн соёлын биет бус өвийн яаралтай хамгаалах шаардлагатай өвийн жагсаалтад бүртгэгдсэн байдаг.
Сэлэнгэ аймгийн Нэгдсэн музей цаашид хүүхэд, өсвөр үеийнхэнд үндэсний өв соёл, түүхийн дурсгалт өвүүдийг сурталчлан таниулах боловсролын хөтөлбөрүүдийг тогтмол зохион байгуулж, эх түүх, өв уламжлалаа дээдлэн хайрлах үзлийг төлөвшүүлэхэд чиглэсэн олон ажлуудийг хийхээр төлөвлөжээ.
