Эрин зууны бахархал болсон Эрдэнэт хотын 50 жилийн ойг угтан бүтээж буй баримтат киноны зураг авалт өнөөдөр албан ёсоор эхэллээ.
Кино зураг авалт эхэлсэнтэй холбогдуулан Эрдэнэт хотын 50 жилийн ойн бэлтгэл хангах ажлын багийн дарга Б.Оюун-Эрдэнэ баримтат киноны уран бүтээлчдийн баг болон ахмад сэтгүүлчидтэй уулзаж, киноны агуулга, үзэл санаа, бүтээлийн ач холбогдлын талаар санал солилцлоо.
Эрдэнэт хотын 50 жилийн ойн баримтат киног бүтээх сонгон шалгаруулалтад “НамуунЗэт” продакшн, “Золжаргал энд Сон фильм” ХХК шалгарсан бөгөөд ерөнхий продюсероор Монгол Улсын Соёлын гавьяат зүтгэлтэн, сэтгүүлч, продюсер, баримтат киноны найруулагч Г.Золжаргал ажиллаж байна.
Баримтат кинонд Эрдэнэтийн овооны зэс, молибдений ордыг нээн илрүүлж, эдийн засгийн эргэлтэд оруулсан түүхэн үйл явдлаас эхлэн Эрдэнэт хотын бүтээн байгуулалт, хөгжил дэвшлийн замналыг бодит баримт, түүхэн гэрчүүдийн дурсамж, архивын материалд тулгуурлан өгүүлэх юм.
Киноны агуулгын бүтцэд уран сайхны найруулга, баримтат түүхэн эх сурвалжууд, Эрдэнэт хотын анхдагч илгээлтийн эзэд болон бүтээн байгуулалтын эхэн үеийн түүхэн хүмүүсийн амьд яриа, сурвалжлагууд багтаж, хотын хөгжлийн 50 жилийн түүхийг олон талт өнцгөөс харуулахыг онцоллоо.
“НамуунЗэт” продакшн, “Золжаргал энд Сон фильм” ХХК нь нийгмийн асуудлыг хөндсөн нийтлэл, сурвалжилга, олны танил хүмүүсийн хөрөг, баримтат кино, улс орны бүтээн байгуулалтын түүхийг өгүүлсэн бүтээлүүд зэрэг 300 гаруй уран бүтээл туурвисан, 20 гаруй жилийн туршлагатай хамт олон юм.
