Уран гулгагч Ча Жүн Хван жүжигчний карьераа дахин эхлүүлэхээр болжээ. Түүний шинэ агентлаг болох “Fantagio”-гоос “Ча Жүн Хван одоогоор “Palace Land” бүтээлд тоглох талаар ярилцаж байгаа бөгөөд боломж өндөр байгаа” хэмээн мэдэгдсэн байна.
“Palace Land” нь паркт ажилладаг цагийн ажилчдын өдөр тутмын амьдралыг харуулах инээдмийн цуврал аж. Ча Жүн Хванд гол дүрийг санал болгосон гэнэ.
Ча Жүн Хван нь Олимпын наадамд БНСУ-ыг төлөөлөн гурван удаа оролцсон тамирчин бөгөөд саяхан болсон “Milano Cortina 2026 Winter Olympics”-ын эрэгтэй ганцаарчилсан уран гулгалтын төрөлд дөрөвдүгээр байр эзэлсэн юм. Энэ нь Өмнөд Солонгосын эрэгтэй уран гулгагчдын түүхэн дэх хамгийн өндөр амжилт болсон юм.
Сонирхолтой нь, Ча Жүн Хван хүүхэд ахуйдаа буюу 2007 онд сурталчилгааны моделиор энтертайнмент салбарт анх орж байжээ. Дараа нь тэрбээр “The Return of Iljimae” зэрэг цувралуудад дүр бүтээж байсан бөгөөд 2015 онд улсын уран гулгалтын шигшээ багт элссэн байна.
Тэрбээр өвлийн олимпод дөрөвдүгээр байр эзэлснийхээ дараа буюу энэ оны эхээр “Fantagio”-тай гэрээ байгуулж, жүжигчний карьераа үргэлжлүүлэхээр болжээ.
