Гурван өдөр үргэлжлэх “Монголын уран нугаралтын чуулган 2026”-гийн хөтөлбөрт бэсрэг наадам, “УЯН ШОУ” гала тоглолт, уран нугаралтын түүх, хөгжлийн тухай семинар, олон улсын уран бүтээлчид, багш нарын воркшопууд багтжээ.
Өөрөөр хэлбэл, “Монголын уран нугаралтын чуулган–2026”-г зөвхөн уран нугараачид, суралцагчид болон мэргэжлийн уран бүтээлчдийн хүрээнд зохион байгуулах бус, харин дотоодын болон олон улсын жуулчдыг татах соёл, аялал жуулчлалын нэгдсэн үйл ажиллагаа болгох зорилго тавьж буй юм.
Уг олон улсын чуулганы эхний өдөр болох үйл ажиллагааны нэг нь бэсрэг наадам бөгөөд энэ үеэр бөхчүүд, харваачид, морьтнуудын үзүүлбэрийг толилуулж, монгол соёлыг гүн гүнзгий мэдрэх боломжийг олон улсын оролцогчдод олгох ажээ. Харин “UYAN SHOW: Gravity & Grace” гала тоглолт нь Монголын уламжлалт уран нугаралтын өв соёл, орчин үеийн циркийн урлагийг тайзнаа харуулах юм.
“Монголын уран нугаралтын чуулган-2026” энэ сарын 19-21-нд Тэрэлжийн байгалийн цогцолборт газарт болно.
Тухайлбал, “Уян шоу” гала тоглолтын хөтөлбөрт МУГЖ Э.Лхагва-Очирын сандалтай тэнцвэрийн үзүүлбэр, Монте Карлогийн олон улсын циркийн наадмын хүрэл цомын эзэд “Nomads Archers Girls” хамтлагийн нум сумтай уран нугаралт, Монголын циркийн урлагийн хурд ба тэнцвэрийн тоглолтууд, үсний хүчээр агаарт гайхамшиг бүтээх өвөрмөц үзүүлбэрүүдийг багтаажээ.
Уран нугаралт бол монгол хүний биеийн гайхамшигт боломж, таталцлын хүчийг даван туулах тэнцвэр, уян налархай “үзэсгэлэнт” хөдөлгөөн, гоо сайхны төгс зохицлыг тайзнаа харуулдгаараа онцлог, өвөрмөц өв соёл маань билээ. Тиймээс уран нугаралтын түүх, хөгжлийг хамарсан семинарын хүрээнд циркийн туршлагатай мэргэжилтнүүд, нугараачид, тэнцвэрийн жүжигчид карьераа хэрхэн эхлүүлэх, дэлхийн нэр хүндтэй тайзан дээр хэрхэн тоглох талаар зөвлөгөө, мэдээллийг хуваалцах юм байна.
Түүнчлэн “Монголын уран нугаралтын чуулган 2026”-гийн хүрээнд хөнгөн сонирхолтой уур амьсгал бүрдүүлж, нэг болон хоёр гар дээр урт хугацаанд тэнцвэр барих, уран нугаралтын дасгал зэрэг хөгжилтэй сорилтуудыг зохион байгуулахын зэрэгцээ олон улсын уран бүтээлчид, багш нар төрөл бүрийн воркшопуудыг удирдан явуулах ажээ.
