Хүүхдийн номын уран бүтээлчдийн дэлхийн хамгийн нэр хүндтэй шагналуудын нэг болох Ханс Кристиан Андерсений нэрэмжит шагналын 2026 оны шилдэг уран бүтээлчдийн номын үзэсгэлэн Хүүхдийн төв номын санд нээлтээ хийлээ. Үзэсгэлэнгийн хүрээнд хүүхдийн номын уран бүтээлчдийн туршлага солилцох гурав дахь удаагийн уулзалт зохион байгуулагдаж, дэлхийн 12 орны нэрт зохиолч, зураачдын шилдэг бүтээлүүдийг танилцууллаа. Уулзалтад Монголын хүүхдийн номын зохиолч, орчуулагч, зураач, номын санчид болон хүүхэд залуус оролцож, олон улсын шилдэг бүтээлүүдтэй танилцсан байна. Энэ үеэр Азийн сангийн зөвлөх Н.Ундраа Ханс Кристиан Андерсений шагналын тэргүүн байр болон богино жагсаалтад шалгарсан уран бүтээлчдийн бүтээлүүдийн онцлогийг танилцуулжээ. Тэрбээр хүүхдийн номын зохиолч, зураач Циа Гао (Cia Gao), нэрт зохиолч Майкл Розен (Michael Rosen) нарын бүтээлүүдийг онцлон дурдсан байна.
Өдгөө 80 насыг зооглож буй Майкл Розен нь хүүхдийн номын уламжлалт ойлголтыг шинэчилж, хүүхдийн ертөнцөд амьдралын хүнд сэдвүүдийг ойлгомжтой хэлбэрээр хүргэдгээрээ алдартай уран бүтээлч юм. Тэрбээр олон арван ном туурвихаас гадна их сургуульд багшилдаг байна.
Мөн арга хэмжээний үеэр Монгол Улс Хүүхэд, залуучуудын номын олон улсын зөвлөл (IBBY)-д нэгдсэн түүхийг онцоллоо. Нэрт зохиолч Ж.Дашдондогийн үүсгэн байгуулсан тус зөвлөлийн үйл ажиллагааг Ж.Сүнжидмаа үргэлжлүүлэн хөгжүүлж, олон улсын хамтын ажиллагааг өргөжүүлсэн байна.
Түүний хүүхдийн номын салбарт 20 гаруй жил тууштай ажилласан үр дүнд Монгол Улс 2005 онд IBBY-ийн албан ёсны гишүүн болж, үйл ажиллагаагаа идэвхтэй үргэлжлүүлж байгаа юм.
Азийн сангийн хэрэгжүүлж буй хөтөлбөрийн хүрээнд цаашид хүүхдийн номын уран бүтээлчид болон хэвлэлийн байгууллагуудтай цуврал уулзалтууд зохион байгуулахаар төлөвлөжээ. Үүний үр дүнд дотоодын хэвлэлийн газрууд дэлхийн шилдэг хүүхдийн номын бүтээлүүдийн зохиогчийн эрхийг авч, монгол хэлээр уншигчдад хүргэх боломж нэмэгдэх юм.
