“Шинэ өглөө” нэгдлийн санаачилга, зохион байгуулалтаар хэрэгжиж буй “Now Art 2026” олон улсын дүрслэх урлагийн үзэсгэлэн Монголын урчуудын эвлэлийн арт галерейд дэлгэгдлээ.
Тус үзэсгэлэнд Монгол Улсын 14, БНСУ-ын гурав, БНХАУ-ын нэг уран бүтээлч буюу нийт 18 уран бүтээлч оролцжээ. Монголын уран бүтээлчид, БНСУ-ын “Komust” медиа арт баг болон БНХАУ-ын уран бүтээлчийн хамтын ажиллагааны хүрээнд зохион байгуулагдаж буй энэхүү үзэсгэлэн нь улс орнуудын уран бүтээлчдийн харилцан солилцоо, соёлын ойлголцол, бүтээлч сэтгэлгээний уулзварыг бий болгохыг зорьжээ.
“Now Art 2026” үзэсгэлэнгийн гол санаа нь өнгөрсөн ба ирээдүйн дунд орших “Одоо” хэмээх цаг хугацааны агшинд төвлөрсөн байна. Өнгөрсөн дурсамж, ирээдүйн төсөөллийн завсарт орших энэ мөч бол бидний жинхэнэ амьдрал өрнөдөг цорын ганц бодит орон зай юм. “Өнгөрсөн ба ирээдүйн дундах үнэн бол Одоо” хэмээх үзэл санааны хүрээнд зохион байгуулагдсан энэхүү үзэсгэлэн нь үзэгчдийг энэхүү түр зуурын атлаа хамгийн бодит мөчид төвлөрөхийг урьж, хурдацтай өөрчлөгдөж буй дэлхийд хүн төрөлхтөн өөрийн утга учир, мөн чанар, оршихуйн үнэнийг хэрхэн эрэлхийлж буйг уран бүтээлээр дамжуулан харуулсан.
Үзэсгэлэнд медиа арт, монгол зураг, уран зураг, уран баримал зэрэг дүрслэх урлагийн олон төрлийн бүтээлүүд дэлгэгдсэн бөгөөд уран бүтээлчид “Одоо” цаг хугацааг өөр өөрийн өнцгөөс тайлбарлан, хүний дотоод ертөнц, нийгмийн нөлөө, технологийн хурдацтай хөгжил, байгальтайгаа харилцах харилцаа, уламжлал ба шинэчлэлийн огтлолцлыг бүтээлүүддээ тусгасан байна.
“Now Art 2026” бол зөвхөн үзэх үзэсгэлэн бус, мэдрэх, эргэцүүлэх, асуулт тавих орон зай юм. Бид өнөөдөр юу бүтээж, хэрхэн амьдарч байгаа нь маргааш хэн байхыг тодорхойлдог. Тиймээс “Одоо” бол өнгөрсөн ба ирээдүйг холбосон хамгийн үнэ цэнтэй, хамгийн бодит цаг хугацаа билээ.
