Бүс нутгийн залуучуудад зориулсан “Жангар” наадам тав дахь жилдээ үзэсгэлэнт Дөргөн нуурын эрэгт болно.
“Жангар” наадмыг Говь-Алтай аймгийн ЗДТГ-аас санаачлан, ганц бие залуучуудын хүрээнд зохион байгуулдаг Монголын анхны бөгөөд томоохон энтертайнмент эко-фестиваль юм. Энэхүү үйл ажиллагаа нь залуучуудын харилцаа холбоог өргөжүүлэх, шинэ танилтай болох, чөлөөт цагаа байгаль дунд зөв боловсон өнгөрүүлэх зорилготой.
Говь-Алтай аймгийн Хөхморьт сум, үзэсгэлэнт Дөргөн нуурын эрэгт 21 аймаг, нийслэл хот болон ОХУ-ын Буриад, Өвөрмонголоос ирсэн 18-аас дээш насны залуус цуглардгаараа онцлогтой юм.
Наадамд оролцогчдод зориулан соёл хүмүүжлийн илтгэл, урлагийн тоглолт, спортын олон төрлийн тэмцээн уралдаан болох тухай тус аймгийн ЗДТГ-аас мэдээлэв. Тухайлбал, залуучуудын гэр бүл төлөвлөлт, ургийн бичиг хөтлөх аргазүйн сургалт мэдээллийг өгөх мөн элсний волейбол, элсний сумо, олс таталт гэх мэт залууст зориулсан үйл ажиллагаа өрнөнө гэв.
Тавдахь жилдээ зохиогдох “Жангар” наадам өнөө жил долоодугаар сарын 26-29-нд болох юм.
Ташрамд, Монголын долоодахь том нуур болох Дөргөн нь Ховд аймгийн Чандмань, Говь-Алтай аймгийн Хөхморьт, Завхан аймгийн Дөрвөлжин зэрэг гурван сумын заагт орших баруун Монголын Их нууруудын хотгор дахь давст нуур юм. Улаанбаатар хотоос 1300 км зайтай.
