“La La Land” кино 10 жилийн ойдоо зориулан наймдугаар сарын 16-наас АНУ-ын кино театруудаар дахин үзэгчдэд хүрэхээр болсон байна. Энэхүү тусгай үзвэрээр шүтэн бишрэгчид Дэмиен Шазеллийн найруулсан алдарт мюзиклийг дахин том дэлгэц дээр үзэх боломжтой болох юм.
2016 онд нээлтээ хийсэн уг кинонд Райан Гослинг Себастьян, Эмма Стоун Миа нарын дүрийг бүтээж, Лос Анжелес хотод мөрөөдөл, хайр, урлагийн төлөө тэмцэж буй хоёр хүний түүхийг харуулсан билээ.
Кино нь 2017 оны “Оскар”-ын шагнал гардуулах ёслолоос зургаан шагнал хүртэж, Эмма Стоун шилдэг эмэгтэй жүжигчин, Дэмиен Шазелл шилдэг найруулагч зэрэг томоохон шагналуудын эзэн болсон юм.
“La La Land” нь зөвхөн хайр дурлалын тухай кино биш, харин мөрөөдлийн төлөө тэмцэх, амжилт ба хувийн сонголтын талаар өгүүлсэн бүтээл гэдгээрээ олон жилийн турш үзэгчдийн сэтгэлд үлджээ.
Киноны “City of Stars”, “Another Day of Sun” зэрэг дуу, өнгө төрх, бүжгийн хэсгүүд нь орчин үеийн кино урлагийн хамгийн танигдсан мөчүүдийн нэг болсон юм.
