Жүжигчин Николас Кейж “Fortitude” нэртэй Дэлхийн II дайны сэдэвт киноны гол дүрд тогложээ. Харамсалтай нь, олон нийтэд хүргээгүй байсан тус киноны хуулбарыг “Netflix” компаниас алдагдсан байна.
Киноны зохиолч, продюсер Саймон Афрамын мэдээлснээр, киноны шифрлээгүй мастер хувийг “Netflix”-ийн хүсэлтээр Холливууд дахь оффист нь хүргүүлсэн байна. Харин ердөө ес хоногийн дараа “Netflix”-ээс илгээсэн имэйлд оффисоос хэд хэдэн хатуу диск хулгайд алдагдсан бөгөөд тэдгээрийн дотор “Fortitude” киноны хуулбар байсан гэж мэдэгджээ.
Улмаар уг киног бүтээгчид дээрх үндэслэлээр 105 сая ам.долларын нөхөн төлбөр нэхэмжилсэн байна. Нэхэмжлэлд дурдсанаар, энэ явдлын улмаас киноны зах зээлийн үнэ цэнэ ноцтой унасан бөгөөд түгээгчид хэзээ нэгэн цагт хууль бусаар интернэтэд тархаж болзошгүй бүтээлийг худалдаж авахаас татгалзах эрсдэлтэй болсон гэж үзжээ. Мөн кинонд 45 сая гаруй ам.долларын хөрөнгө оруулж, долоон жилийн турш бүтээсэн гэж мэдэгдсэн байна.
Харин “Netflix” эдгээр буруутгалыг няцааж, киноны хуулбар нь салбарын аюулгүй байдлын стандартын дагуу хамгаалагдаагүй байсан гэж мэдэгдсэн байна. Мөн хулгайн хэргийг мөрдөн шалгах ажиллагаанд хамтран ажиллаж, хууль бус тараалтыг хянахад тусалсан ч кино алдагдсанд өөрсдийгөө хариуцлага хүлээхгүй гэж үзэж байгаа аж.
