“Beta entertainment”, “Erkhes entertainment”-ийн хамтын бүтээл “Эцсийн зогсоол Э цэг” уран сайхны кино нээлтээ хийгээд удаагүй байна. Хайр сэтгэл, гэр бүлийн үнэ цэнэ, хүний сайхан сэтгэлийн тухай өгүүлдэг киноны гол дүрд реппэр Rokit bay буюу О.Баярсайхан тоглосон юм. Түүнтэй уран бүтээлийнх нь талаар ярилцсанаа хүргэе.
-Нээлтээ хийгээд удаагүй байгаа “Эцсийн зогсоол Э цэг” уран сайхны киноны талаар яриагаа эхэлье. Гол дүр бүтээхэд танд амаргүй байв уу?
-Энэ зун “Эцсийн зогсоол Э цэг” хэмээх кинонд тоглолоо. Кино маань өнгөрсөн сарын 29-нд нээлтээ хийсэн. Би Зориг хэмээх залуугийн дүрийг бүтээсэн. Ерөнхийдөө драм төрлийн сонирхолтой үйл явдалтай бодит амьдралаас сэдэвлэсэн кино болсон.
-Дэлгэцийн бүтээлд анхаарал хандуулаад дуугаа түр завсарласан байх?
-Киноны ажил гээд уран бүтээлээ хойш тавьсан л даа. Гэхдээ одоо шинэ цомгийн ажилд орсон. Эхний дуу бэлэн болсон, удахгүй клип нь цацагдах байх.
-Дууныхаа үгийг юунаассэдэвлэж бичдэг вэ?
-Ерөнхийдөө бол “Бид хоёр” бүтээл шиг сэтгэлдээ мэдэрсэн зүйлээ дуулдаг. Тухайн үеийн сэтгэл зүйн байдлаас шалтгаалдаг. Мөн өмнө нь мэдэрч байсан мэдрэмжүүдээсээ оруулж өгөх дуртай л даа.
-Таны амьдрал урлагтай салшгүй холбоотой болсон гэж хэлэхэд буруудахгүй байх. Ер нь анхнаасаа л урлагийн хүн болно гэж боддог байсан уу?
-Би өөрийгөө урлагийн хүн болно гэж зүүдэлж ч байгаагүй. Урлагийн салбарыг амьдралаа болгоод явна гэж бодож байгаагүй. Америкт бизнесийн чиглэлээр суралцаж байх хугацаандаа хажуугаар нь хөгжим оролдож эхэлсэн нь өнөөдрийн намайг бүтээсэн.
-Өөрийнхөө төлөө хийсэнхамгийн зөв алхмаа нэрлэвэл?
-Урлагийн салбарыг сонгосноо хамгийн зөв алхам гэж боддог. Маш олон зүйлийг золиосолсон бас их тэнэг зориг гаргасан гэж хэлж болно.
-Таны хамгийн тэвчиж чаддаггүй зүйл юу вэ?
-Хүнд урд нас гэж байдаг бол би хорон муу санаатныг дардаг баатар байсан юм шиг санагддаг. /инээв/ Нийгэмд болж бүтэхгүй байгаа зүйл хүн хүнтэйгээ хүнлэг бус харилцаж байгаа гэх мэт зүйл дээр өөрийн эрхгүй тэмцмээр байдаг. Хэзээ ч тэр хүмүүст бууж өгдөггүй.
-Хөгжим таны хувьд юу вэ?
-Хөгжим бол би. Дуу, хөгжимгүй бол Баярсайхан гэдэг хүний тодорхойлолт гарч ирэхгүй гэж боддог. Тийм болохоор хөгжим бол яалт ч үгүй миний нэг хэсэг.
