Америкийн рэп хөгжмийн домог Тупак Шакур (Tupac Shakur)-ын амийг хөнөөсөн хэргээс хойш 30 жил өнгөрсний дараа уг хэрэгт холбогдсон гэмт бүлэглэлийн удирдагч асан шүүхийн өмнө зогсох гэж байна.
Калифорнийн гэмт бүлэглэлийн хуучин удирдагч Дуэйн “Киффи Ди” Дэвис өдгөө 63 настай бөгөөд Тупак Шакурын амийг хөнөөсөн хэрэгт буруутгагдан шүүхээр орох юм.
1996 оны есдүгээр сард Лас-Вегаст нэгэн буутай этгээд Тупакийн сууж явсан BMW машины хажууд цагаан “Cadillac”-аар зэрэгцэн очиж, тухайн үед 25 настай байсан Тупакийг хэд хэдэн буудсанаар тэрбээр зургаан хоногийн дараа нас барсан.
Тэр цагаас хойш хэн Тупакийн аминд хүрсэн, ямар шалтгаанаар түүнийг хөнөөсөн нь хип-хоп хөгжмийн ертөнцийн хамгийн том нууцлаг хэргүүдийн нэг хэвээр үлджээ. Харин Дуэйн “Киффи Ди” Дэвисийн шүүх хурал эхэлснээр энэ олон жилийн нууц тайлагдах боломжтой болж байна.
Тупакийн аллагын мөрдөн байцаалт олон жилийн турш ахицгүй мэт харагдаж байсан. Гэвч 2019 онд Дуэйн “Киффи Ди” Дэвис “Compton Street Legend” нэртэй ном хэвлүүлснээр хэрэгт шинэ эргэлт гарчээ. Тэр номондоо өөрийгөө Тупакийн аллагын талаар мэдэх амьд үлдсэн цөөн гэрчийн нэг гэж тодорхойлсон байна.
Дуэйн “Киффи Ди” Дэвис тухайн үед “South Side Compton Crips” гэдэг гэмт бүлэглэлийн удирдагч байсан аж. Түүний номонд өгүүлснээр, Тупак буудуулсан орой Дэвис өөр гурван хүний хамт цагаан “Cadillac”-д сууж, өрсөлдөгч гэмт бүлэглэлийн гишүүн Орландо “Baby Lane” Андерсоныг зодсон хүмүүсээс өшөө авахыг зорьсон гэсэн байна.
Прокурорууд уг номыг Дуэйн “Киффи Ди” Дэвис Тупакийн аллагыг зохион байгуулсан гэдгээ хүлээн зөвшөөрсөн нотлох баримт гэж үзэж байгаа. Тухайлбал, Дэвисийг “шийдвэр гаргагч”, өөрөөр хэлбэл бүлэглэлийн бусад гишүүдэд тушаал өгдөг хүн байсан гэж үзэж байна. Харин Дэвисийн өмгөөлөгчид түүний номонд бичсэн зүйлсийг номоо борлуулахын тулд хэтрүүлэн бичсэн зохиомол зүйл гэж мэдэгдэж буй бөгөөд Дэвис өөрөө номыг бичээгүй, харин “сүүдрийн зохиолч” буюу “ghostwriter” бичсэн гэж мэдэгдээд байгаа юм.
