Тэмүүжин, Боорчи нарын нөхөрлөлийн тухай “Монгол андгай” бүтээл нийтийн хүртээл болно.
Их Монгол Улсын сүр хүчийг дэлхий дахинаа зөвхөн хүлэг морьдын төвөргөөн, хурц илд, нумын хүчээр төсөөлөх нь бий. Гэвч цаг хугацааны хөшгийг сөхөн түүхийн жимээр алхваас зэвсгийн хүчнээс илүүтэй тэнгэр язгуурт “андгай” буюу амиа хуваасан алтан нөхөрлөл дэлхийн түүхийг өөрчилснийг харж болно.
“Монголын Нууц Товчоо” хөлгөн сударт мөнхөрсөн тэрхүү гайхамшигт түүхээс сэдэвлэсэн “Монгол андгай” бүтээл уншигч, сонсогчдын хүртээл болоход бэлэн болоод байна.
Найман зууны тэртээ булаагдсан найман шарга агтныхаа мөрөөр хээр талд гагц биеэр явсан Тэмүүжин, Наху баяны ганц хөвүүн Боорчитой гүүний зэлэн дээр таарсан нь хорвоогийн уудамд олон зууныг эзэгнэх их хувь тавилангийн алтан утсыг зангидсан учрал байв. “Эрийн бэрхшээл нэгэн адил” хэмээн олз үл горьдон Тэмүүжинийг дагасан Боорчийн эрс шулуун шийдвэр нь хожим Их Эзэнт Гүрний анхны тулгыг зангидан тавьсан билээ. Хэрэв тэр нэгэн өдөр хоёр хөвүүн учраагүйсэн бол түүхийн хүрд ямар зүгт эргэх байсныг хэн бээр ч үл гадарлана.
Энэхүү бүтээл нь уншигч таныг найман зууны тэртээх түүхийн хуудсаар аялуулахын сацуу цаг хугацааны уртад хэзээ ч бүдгэрэх ёсгүй итгэлцэл, жудаг ёсны үнэ цэнийг зүрх сэтгэлд тань тодруулан үлдээх болно. “Монгол андгай” бүтээлийг тун удахгүй албан ёсны номын сувгууд болон аудио платформуудаар хүлээн авч үзэх боломжтой.
