Домогт дуучин, “Грэмми”-ийн шагналт уран бүтээлч Лайонел Ричи Сент-Луис хотод болсон тоглолтынхоо дараа урьдчилан сэргийлэх зорилгоор эмнэлгийн эрчимт эмчилгээний тасагт хэвтсэн талаар “People”-д мэдээлжээ.
Өдгөө 77 настай дуучин наймдугаар сарын 29-нд Сент-Луис хотын “The Muny” театрт тоглолтоо хийснийхээ дараахан биеийн байдлаа хянуулах үүднээс өөрөө эмнэлэгт хандсан байна. Одоогоор Ричигийн төлөөлөгч “People”-ийн мэдээлэл авах хүсэлтэд албан ёсны хариу өгөөгүй байгаа аж.
Тэрбээр одоогоор “Earth, Wind & Fire” хамтлагийн хамт “Sing a Song All Night Long” аялан тоглолтоо үргэлжлүүлж байгаа юм. Тоглолтын үеэр Ричи сүүлчийн дуу болох алдарт “All Night Long”-оо дуулахдаа багийнхнаасаа сандал авчрахыг хүссэн талаар мэдээлжээ.
Энэ нь дуучны сүүлийн саруудад тулгарсан эрүүл мэндийн хоёр дахь асуудал болж байна. Тэрбээр өнгөрсөн зургадугаар сарын 24-нд Миннесота мужийн Сент-Пол хотод болсон аялан тоглолтынхоо эхний үдэш тайзан дээр бие нь тавгүйрхэж, толгой нь эргэсний улмаас тоглолтоо хугацаанаас нь өмнө дуусгаж байсан юм.
Одоогийн байдлаар Лайонел Ричигийн биеийн байдлын талаар дэлгэрэнгүй мэдээлэл гараагүй байна. Түүний дараагийн тоглолт есдүгээр сарын 26-нд Сан-Франциско хотод товлогджээ.
