Домогт дуучин Шер хүү Элайжа Блю Оллманы асран хамгаалалтын асуудлаарх шүүхийн маргаанд бэр Марианжела Кинг-Оллманыг санхүүгийн ашиг хонжоо хайж байна хэмээн буруутгажээ.
Шер өнгөрсөн наймдугаар сарын 28-нд Лос-Анжелесийн шүүхэд нэмэлт баримт бичиг хүргүүлж, 50 настай хүү Элайжа Блю Оллманы асран хамгаалагчаар түүний эхнэр Марианжела Кинг-Оллманыг томилохыг эрс эсэргүүцсэн байна.
Шүүхийн баримт бичигт Шерийн тал Марианжела Кинг-Оллманыг Элайжагаас удаан хугацаанд хөндий байсан бөгөөд өмнө нь гэрлэлтээ цуцлуулах ажиллагаа эхлүүлж байсан гэжээ. Мөн Элайжаг хүнд байдалд байх үед нь шаардлагатай тусламж, дэмжлэг үзүүлээгүй гэж буруутгасан байна.
Түүнчлэн Шерийн тал бэрээ энэ нөхцөл байдлыг ашиглан Элайжагийн амьдралд дахин орж ирж, мөнгө болон тодорхой хэмжээний алдар нэрийн төлөө асран хамгаалагч болохыг эрмэлзэж байна хэмээн мэдэгджээ.
Одоогоор Элайжа Блю Оллман Нью-Хэмпшир мужийн сэтгэцийн эмнэлэгт байгаа бөгөөд түүнд эрүүгийн хэд хэдэн хэрэгтэй холбоотой асуудал тулгараад байгаа аж. Асран хамгаалагчийг хэнээр томилох асуудал одоо хүртэл шийдэгдээгүй байна.
Энэ асуудлаар Шер өөрийн том хүү Чаз Боно болон Элайжагийн эцэг нэгтэй ах Девон Оллман нарыг боломжит асран хамгаалагчид гэж дэмжиж байгаа юм.
Харин Марианжела Кинг-Оллман Шерийн мэдэгдлийг няцааж, өөрийгөө Элайжатай 13 жил гэрлэсэн бөгөөд нөхрөө эдгэрч, урт хугацааны эмчилгээ хийлгэх боломжтой байгаасай гэж хүсэж байгаагаа илэрхийлжээ. Тэрээр Шер хүүгийнхээ амьдралд хэт их хяналт тогтоохыг оролдож байна хэмээн хариу мэдэгдсэн байна.
Элайжа Блю Оллман болон Марианжела Кинг-Оллман нар 2013 онд гэрлэсэн бөгөөд тэдний харилцаа сүүлийн жилүүдэд тогтворгүй байсан талаар хэвлэлүүд мэдээлж байсан юм. Шүүхийн энэхүү маргааны дараагийн хэлэлцүүлэг арванхоёрдугаар сарын 1-нд үргэлжлэхээр товлогджээ.
