Зураач, судлаач М.Батзориг бие даасан гурав дахь үзэсгэлэнгээ “Гарц орц” нэртэйгээр “Бий” контемпорари арт галерейд дэлгэлээ.
Тус үзэсгэлэнд зураач М.Батзоригийн сүүл үед хийсэн 60 орчим бүтээлийг дэлгэсэн бөгөөд гэрэл зураг, хэвлэл, тосон болон акрил, зураасан зураг, коллажын техник ашигласан холимог медиа бүтээлүүд нь зураачийн өөрийнх нь дурсамж, өнөөгийн нийгмээсээ мэдэрч буй өвөрмөц мэдрэмжүүдийг өөрийнхөө визуаль хэлтэй сүлсэн сюрреалист өнгө аястай.
Мөн уг үзэсгэлэнгийн үеэр М.Батзоригийн гурав дахь ном болох “Монголын дүрслэх урлагийн модерн, контемпорари хандлага” хэмээх орчин үеийн монголын дүрслэх урлагийн товч түүхийн номыг нээлээ. Уг номонд 1968-2020 он хүртэлх цаг хугацаанд шинэ арга, барил нэвтрүүлсэн хэмээн үзэж болох 27 бүтээлч, гурван уран бүтээлийн нийгэмлэгийг сонгон авч тэдний цаг үедээ бий болгосон өвөрмөц, бүтээлч барил, гадаад хийгээд дотоод нөлөөллийг тодруулах замаар монголын дүрслэх урлагийн сэтгэлгээ орчин үежсэн явцыг тодруулахыг зорьсон болно.
“Гарц орц” үзэсгэлэн есдүгээр сарын 27-ны өдрийг дуустал үргэлжилнэ.
