Баян-Өлгий аймгийн музей хүүхэд, багачуудын орон нутгийн түүх, соёлын өвийн талаарх мэдлэгийг нэмэгдүүлэх зорилгоор “Музейгээр аялахуй” танин мэдэхүйн өдөрлөг зохион байгууллаа.
“Соёл, урлагийн ажилтны өдөр”-ийг тохиолдуулан зохион байгуулсан тус өдөрлөгт Өлгий сумын ерөнхий боловсролын 3 дугаар сургуулийн 9 дүгээр ангийн сурагчид болон музейн дэргэдэх “Бяцхан өвлөн уламжлагч” клубийн гишүүд оролцов.
Музейн ажилтнууд хүүхдүүдэд үзмэрээр дамжуулан орон нутгийн түүх, соёлын өв, уламжлалт ахуй, байгаль хамгааллын талаар тайлбарлаж, музейн үйл ажиллагаа болон соёлын өвийг хамгаалахтай холбоотой хууль тогтоомжийн талаар мэдээлэл өгчээ.
Мөн хүүхдүүд музейн үзмэрүүдийг сонирхон үзэж, танин мэдэхүйн үйл ажиллагаанд оролцсон байна.
Өдөрлөгөөр хүүхэд, багачуудын нас, сэтгэхүйн онцлогт тохирсон аргаар түүх, соёлын өвийг таниулах, музейн талаарх ойлголтыг нэмэгдүүлэхэд анхаарчээ. Ингэснээр хүүхдүүд нутгийнхаа түүх, өв соёлыг үзмэрээр дамжуулан танин мэдэх, соёлын өвөө хайрлан хамгаалах ойлголттой болоход чиглэсэн байна.
Баян-Өлгий аймгийн музей сан хөмрөгтөө 5448 гаруй үзмэртэй бөгөөд өдөрт дунджаар 80-100 хүн үйлчлүүлдэг. Жилд дотоод, гадаадын 21 мянга гаруй хүн тус музейгээр үйлчлүүлдэг байна.
Монгол Улсын музейн тухай хуулийн 9.1-д Монгол Улсын харьяат 16 хүртэлх насны хүүхэд музейн үзүүлэнгийн танхимаар үнэ төлбөргүй үйлчлүүлэхээр заасан байдаг.
