Өмнөд Солонгосын жүжигчин Бён У Сок Сөүлийн Ханнам дүүрэгт байрлах тансаг зэрэглэлийн “Hannam The Hill” хотхонд 13 тэрбум воны үнээр орон сууц худалдан авсан гэх мэдээлэл гарлаа.
Тэрбээр 235 ам.метр талбайтай уг орон сууцыг өнгөрсөн тавдугаар сард худалдаж авах гэрээ байгуулсан бөгөөд есдүгээр сарын 2-нд үлдэгдэл төлбөрөө төлж, өмчлөх эрхээ шилжүүлсэн байна. Бүртгэлд тус байрны зээл, барьцааны мэдээлэл бүртгэгдээгүй тул худалдан авалтыг бэлэн мөнгөөр хийсэн гэж үзэж байгаа аж.
Бён У Сокийн хувьд энэхүү худалдан авалт нь онцгой өөрчлөлт хэмээн хэвлэлүүд онцолж байна. Тэрбээр өмнө нь гэр бүлийнхээ санхүүгийн нөхцөл хүнд байсан талаар ярьж, багадаа нарийн, огцом шаттай хоёр давхар байшинд амьдардаг байсан тухайгаа дурсаж байжээ. Тухайн үедээ эмээгээ шатаар өгсөж уруудахыг хараад хэзээ нэгэн цагт тухтай сайхан гэртэй болохыг хүсдэг байсан хэмээн ярьсан байна.
2010 онд загвар өмсөгчөөр карьераа эхлүүлсэн Бён У Сок 2016 оноос жүжигчний мэргэжлээр ажиллаж эхэлжээ. Тэрбээр “Record of Youth”, “Strong Girl Nam-soon” зэрэг олон ангит кинонд тоглосон ч 2024 оны “Lovely Runner” цувралын гол дүрээрээ олон улсын хэмжээнд ихээхэн алдаршсан юм.
Ийнхүү залуу жүжигчин Бён У Сок уран бүтээлийн амжилтаа үл хөдлөх хөрөнгийн томоохон худалдан авалтаар бататгаж, Солонгосын энтертайнмент салбарын өндөр орлоготой оддын эгнээнд орж буйгаа харууллаа.
