“Дайн ба Энх” хамтлагийн үүсгэн байгуулагч, реппер, продсер МСИТ буюу Д.Энхтайван агсны уран бүтээл, үзэл санаа, бүтээлийн өвийн нэгэн цогц ном болгон баримтжуулж, олон нийтэл хүргэх зорилготой “МСИТ Энхтайван” номын төслийг хэрэгжүүлж эхэлжээ.
Уг төслийг “Гончигсумлаа” сангийн санаачилгаар “Broscode”, “Suuder”, Б.Мэнд-Амар нар хамтран хэрэгжүүлж байгаа талаар “МСИТ Энхтайван” цахим хуудсаар дамжуулан мэдэгдсэн байна.
МСИТ буюу Д.Энхтайван нь 1997 онд “Дайн ба Энх” хамтлагийг санаачлан үүсгэн байгуулж, Монголын хөгжмийн ертөнцөд рэп, хип хоп урсгалыг хөгжүүлэхэд үнэтэй хувь нэмэр оруулж, “Дайн ба Энх” хамтлагтайгаа хоёр цомог туурвин, бие даасан таван тоглолтыг толилуулж байв.
Мөн Seriyoz нэрээр Монголын гэрэл зураг, блогчдын орчинд танигдаж, 2006 онд Монголын гэрэл зургийн “Шинэ агшин нийгэмлэг” ТББ, салбартаа анхдагч Агшин.мн вэбсайт, Монголын фликрчидийн групп зэргийг үүсгэн байгуулж, удирдаж байжээ.
2010 онд өөрийн “Ертөнцийг дүрслэх урлаг” дижитал гэрэл зургийн сурах бичиг, тайлбар номыг бичиж хэвлүүлсэн нь Монголын гэрэл зургийн түүхэнд үлдсэн юм.
