BTS хамтлагийн ахлагч RM анх удаа өөрийн хувийн урлагийн цуглуулгыг музейн үзэсгэлэнгээр олон нийтэд дэлгэн үзүүлнэ. “RM x SFMOMA: Between You and Me” нэртэй үзэсгэлэнг АНУ-ын Сан-Франциско хот дахь “SFMOMA” буюу Сан-Францискогийн Орчин үеийн урлагийн музейд зохион байгуулна.
Үзэсгэлэн 2026 оны аравдугаар сарын 3-наас 2027 оны хоёрдугаар сарын 7 хүртэл үргэлжлэх бөгөөд RM-ийн олон жилийн турш цуглуулсан орчин үеийн урлагийн бүтээлүүдийг танилцуулах юм.
Үзэсгэлэнд 140 гаруй бүтээл дэлгэгдэх бөгөөд RM өөрөө үзэсгэлэнгийн кураторын ажилд идэвхтэй оролцжээ. Тэрбээр бүтээлүүдийг сонгохоос гадна үзэсгэлэнгийн тайлбар, аудио хөтөчийн агуулгыг боловсруулахад оролцсон байна.
RM багаасаа урлагт сонирхолтой байсан бөгөөд уран бүтээлчийн хувьд өөрийн хөгжмийн карьерынхаа туршид дүрслэх урлагийн бүтээлүүдээс урам зориг авч ирсэн юм. Түүний цуглуулгад Пабло Пикассо, Анри Матисс, Марк Ротко зэрэг дэлхийн алдартай уран бүтээлчдийн бүтээлүүдээс гадна орчин үеийн уран бүтээлчдийн бүтээл багтдаг байна.
“SFMOMA”-ийн мэдээлснээр уг үзэсгэлэн нь RM-ийн урлаг, хөгжим болон хувийн амьдралын хоорондын холбоог харуулах зорилготой. Тэрбээр өөрийн цуглуулсан бүтээлүүдээр дамжуулан үзэгчдэд урлагийг хэрхэн мэдэрч, ойлгодог талаарх хувийн үзэл бодлоо хуваалцах аж.
