Австралийн дуучин, ая зохиогч Сиа хөгжмийн каталогийнхоо 50 хувийн эзэмшлийг Шведийн энтертайнмент, хөрөнгө оруулалтын компани “Pophouse”-д 180 сая ам.доллараар худалдсан байна. Энэхүү хэлцлийн талаарх мэдээллийг “People” сэтгүүлд эх сурвалж баталжээ.
Хэлцлээр “Pophouse” нь Сиагийн дууны зохиогчийн эрх болон мастер бичлэгийн эрхийн 50 хувийг эзэмших болсон байна. Харин дуучны нэр, дүр төрхтэй холбоотой эрхүүд хэлцэлд багтаагүй аж.
Сиа “Pophouse”-той хамтран өөрийн уран бүтээлд суурилсан дижитал аватар бүхий үзүүлбэр бүтээхээр төлөвлөж байгаа юм. Тус шоу нь Сиагийн дуучин болон ая зохиогчийн хувиар бүтээсэн дуунуудыг ашиглахаас гадна түүний дуу хоолой орсон бусад алдартай бүтээлүүдийг багтаах төлөвтэй байна.
Хэлцлийн талаарх баримтад дурдсанаар, 180 сая долларын төлбөрийн 165 сая нь Сиа гэрлэхээсээ өмнө бүтээсэн дуунуудтай нь холбоотой бол үлдсэн 15 сая доллар нь гэрлэлтийн үеэр бүтээсэн уран бүтээлүүдэд хамаарч байна. Тус мөнгөний хуваарилалттай холбоотой зарим асуудал эцэслэн шийдэгдээгүй байгаа аж.
“Pophouse” нь өмнө нь Тина Тёрнер, Синди Лаупер, “Iron Maiden”, “KISS” зэрэг уран бүтээлчдийн хөгжмийн эрхүүдийг худалдан авч байсан юм. Харин Сиатай байгуулсан энэхүү хамтын ажиллагаагаар түүний хөгжмийг шинэ хэлбэрээр үзэгчдэд хүргэх томоохон дижитал төсөл хэрэгжүүлэхээр болж байна.
Сиа хөгжмийн каталогийнхоо 50 хувийг 180 сая доллараар худалджээ
