Тайландын “Rinrada: The Influencer” аймшгийн кино Ази болон Ойрх Дорнодын хэд хэдэн улсын зах зээлд түгээгдэхээр болжээ. Тус киноны олон улсын борлуулалтын гэрээнүүдийг АНУ-ын “Screamfest” аймшгийн кино наадмын нээлттэй зэрэгцэн зарласан байна.
Хонконгт төвтэй “Autumn Sun Films” компани уг бүтээлийн олон улсын борлуулалтыг хариуцаж байгаа бөгөөд Макао, Вьетнам, Малайз, Сингапур, Бруней зэрэг оронд түгээхээр төлөвлөжээ. Мөн Тайванийн кино түгээлтийн эрхийг “Moviecloud”, Пакистан болон Персийн булангийн хамтын ажиллагааны зөвлөлийн орнуудын эрхийг “Empire Entertainment” компани тус тус авсан байна.
Киноны гол дүрд Тайландын жүжигчин, цахим нөлөөлөгч Юши Ринрада тогложээ. Үйл явдал нь цахим орчинд олны шүүмжлэл, дайралтад өртөн амьдрал нь сүйрсэн нөлөөлөгч эмэгтэйн тухай өгүүлнэ. Тэрээр нас барсныхаа дараа сүнс болон эргэн ирж, өөрт нь хор хүргэсэн хүмүүсээс өшөө авахын зэрэгцээ санаанд оромгүй хүнтэй холбоо тогтоодог.
Найруулагч Артистая Арриявонгсагийн бүтээсэн уг кино цахим орчны дээрэлхэлт, олны өмнө хүнийг шившиглэх үзэгдлийн хор уршгийг ер бусын аймшгийн үйл явдлаар харуулжээ. Киноны зохиолыг найруулагч хамтран бичсэн байна.
Тус киноны Макао дахь нээлтийг аравдугаар сарын 31-нд, Хэллоуины баяраар хийхээр төлөвлөсөн бөгөөд арваннэгдүгээр сард Вьетнам, Малайз, Сингапур, Брунейд үзэгчдэд хүргэхээр болжээ. Индонез, Филиппин, Мьянмар дахь нээлтийн тов одоогоор тодорхойгүй байна.
