Өнөөдөр залуу жүжигчин М.Төгөлдөрийн төрсөн өдөр.
М.Төгөлдөр ОХУ-ын Кемерово хотын Соёл урлагийн их сургуульд Гавьяат жүжигчин Виктор Васильевич Мирошниченкогийн удирдлагад жүжигчний мэргэжил эзэмшжээ.
Их сургуулиа төгсөж Монголдоо ирмэгцээ Соёлын гавьяат зүтгэлтэн, жүжигчин, продюсер Г.Ундармаагийн үүсгэн байгуулсан “U stage” театрт Михаил Шолоховын “Дөлгөөн Дон”, Олжас Жанайдаровын “Дэрний сэтгэл” жүжигт тоглосон юм. Түүнчлэн тэрбээр “Probe” драмын дугуйлан хичээллүүлэхийн хажуугаар ОХУ-ын Саха улсын “Art Doydu” кино студийн “Legends of Olonkho land” уран сайхны кинонд тоглоод амжсан.
Мөн тэрбээр “Pro” театрын бүтээл, Виктор Хюгогийн “Инээмтгий хүн” визуал драмын жүжгийн Хардкванон, Эрнст Теодор Амадей Гофманий “Цөмөөхэй ба хулганын хаан” үлгэрээс сэдэвлэсэн “Цөмөгч цэрэг ба хулганы хаан” хүүхдийн жүжгийн Дроссельмейер, Александр Дюмагийн “Шадар гурван цэрэг” физикл драмын жүжгийн Де Ришилье хамба, “Prime” энтертайментийн бүтээл “Гайжин” мюзикл драмын жүжгийн Лорд Хироши, “Dolma” театрын бүтээл Жорж Оурэллийн “Амьтны ферм” мета драмын жүжгийн Сквиллер зэрэг дүрээр тайзнаас үзэгчидтэй “уулзсан” юм.
Харин дэлгэцийн уран бүтээлийн тухайд тэрбээр өнгөрсөн онд “Тэг Цэг Үйлдэл” уран сайхны киноны гол дүрд тоглосон бол энэ жил түүний тоглосон “Хараал хүрсэн хот” олон ангит кино, “Овгор” уран сайхны кино үзэгчдэд хүрчээ.
