“The Princess Diaries” киноны ичимхий өсвөр насны гүнжээс эхлээд “The Devil Wears Prada”-гийн загварын сэтгүүлийн туслах, “Les Misérables” киноны эмгэнэлт хувь тавилантай Фантины дүр хүртэл өөрийн жүжиглэх ур чадварыг харуулж, үзэгчдийн хайр хүндэтгэлийг хүлээсэн уран бүтээлч Анн Хэтэуэйн төрсөн өдөр өнөөдөр тохиож байна.
Анн Жаклин Хэтэуэй 1982 оны энэ өдөр буюу арваннэгдүгээр сарын 12-нд АНУ-ын Нью-Йорк хотын Бруклин дүүрэгт төржээ. Түүний ээж Кейт Макколи жүжигчин, харин аав Жералд Хэтэуэй хуульч мэргэжилтэй. Тэрбээр хоёр ах дүүгийн хамт Нью-Жерси мужийн Миллберн хотод өсөж, багаасаа тайзны урлагт сонирхолтой байжээ.
Жүжигчний авьяасаа эрт илрүүлсэн Анн өсвөр насандаа Нью-Йорк хотын “The Barrow Group” театрын сургуульд элсэн суралцсан. Улмаар 1999 онд “Get Real” телевизийн олон ангит кинонд Меган Гриний дүрийг бүтээж, мэргэжлийн жүжигчний гараагаа эхлүүлжээ.
Түүний дэлгэцийн анхны томоохон амжилт 2001 онд гарсан “The Princess Diaries” кино байв. Уг бүтээлд тэрбээр өөрийгөө жирийн нэгэн сурагч гэж боддог байсан ч үнэн хэрэгтээ нэгэн улсын гүнж болохоо мэдсэн Миа Термополисын дүрд тоглосон юм. Жюли Эндрюстэй хамтран тоглосон энэхүү кино дэлхий даяар үзэгчдийн хайрыг татаж, Хэтэуэйг олон улсын хэмжээнд танигдсан залуу жүжигчин болгожээ.
2004 онд “The Princess Diaries 2: Royal Engagement” кинонд Миа гүнжийн дүрдээ эргэн тоглосон бол “Ella Enchanted” бүтээлээр уран зөгнөлт, хөгжмийн төрлийн кинонд өөрийгөө сорьсон байна.
Хэтэуэй 2005 оноос эхлэн өсвөр насныханд зориулсан киноны дүр төрхөөсөө салж, илүү насанд хүрсэн, төвөгтэй дүрүүдийг сонгох болсон. Тэрбээр Анг Лигийн найруулсан “Brokeback Mountain” кинонд Лурин Ньюсомын дүрийг бүтээж, драмын жүжиглэлтээрээ шүүмжлэгчдийн анхаарлыг татсан юм.
Харин 2006 онд “The Devil Wears Prada” кинонд сэтгүүлч болох хүсэлтэй Энди Саксын дүрийг бүтээсэн нь түүний карьерын хамгийн том амжилтуудын нэг болсон. Мэрил Стрипийн бүтээсэн хатуу шаардлагатай сэтгүүлийн эрхлэгч Миранда Пристлитэй хамтран тоглосон уг кино загварын ертөнцийн тухай хамгийн алдартай бүтээлүүдийн нэг болж, Хэтэуэйг дэлхийн хэмжээний од болгожээ.
Үүний дараа тэрбээр 2007 онд “Becoming Jane” кинонд зохиолч Жэйн Остений дүрийг бүтээж, 2008 онд “Get Smart”, “Rachel Getting Married” зэрэг өөр өөр өнгө аястай бүтээлүүдэд тоглосон байна. “Rachel Getting Married” киноны Кимийн дүрээрээ “Оскар”-ын шилдэг эмэгтэй гол дүрийн жүжигчин төрөлд анх удаа нэр дэвшсэн нь түүний жүжигчний ур чадварыг дахин баталсан юм.
2012 он Хэтэуэйн карьерын хамгийн онцгой жилүүдийн нэг байлаа. Тэрбээр Кристофер Ноланы “The Dark Knight Rises” кинонд Селина Кайл буюу Catwoman-ы дүрийг бүтээж, тулаант киноны ертөнцөд өөрийн чадварыг харуулсан юм.
Мөн тэр жил “Les Misérables” мюзикл кинонд Фантины дүрийг бүтээсэн нь түүний жүжигчний замналын оргил амжилтын нэг болсон. Дүрдээ бүрэн хувирахын тулд богино хугацаанд жингээ хасаж, үсээ хусуулан, сэтгэл хөдлөлийн хувьд маш хүнд дүрийг бүтээжээ.
Энэхүү бүтээлээрээ 2013 онд “Алтан бөмбөрцөг”, BAFTA болон Академийн шагнал буюу “Оскар”-ын шилдэг туслах эмэгтэй жүжигчний шагналыг хүртсэн юм. Фантины дүр нь Хэтэуэйг зөвхөн алдартай жүжигчин бус, драмын өндөр ур чадвартай уран бүтээлч гэдгийг дэлхий нийтэд харуулсан бүтээл болсон.
2014 онд тэрээр Кристофер Ноланы “Interstellar” шинжлэх ухааны уран зөгнөлт кинонд доктор Амелиа Брэндийн дүрд тоглож, Мэттью Макконахи, Жессика Честейн нартай хамтран ажилласан.
2015 онд Роберт Де Ниротой хамт “The Intern” инээдмийн драмд тоглож, цахим загварын компанийн үүсгэн байгуулагч Жюль Остины дүрийг бүтээжээ. 2018 онд “Ocean’s 8” кинонд алдарт жүжигчин Дафне Клюгерийн дүрээр тоглосон бол 2019 онд “Modern Love” цувралд оролцсон байна.
2024 оны “The Idea of You” романтик кинонд тэрээр 40 настай ганц бие ээж Солений дүрийг бүтээж, залуу поп одтой хайр сэтгэлийн харилцаа үүсгэж буй эмэгтэйн тухай өгүүлсэн юм.
2026 он Хэтэуэйн уран бүтээлийн хувьд онцгой завгүй жил болж байна. Тэрбээр “The Devil Wears Prada 2” кинонд Энди Саксын дүрдээ эргэн тоглож, “The Odyssey” кинонд Пенелопагийн дүрийг бүтээжээ. Мөн “The End of Oak Street”, “Verity” зэрэг кинонд тоглосон бөгөөд “Mother Mary” бүтээлээрээ поп одын дүрд хувирч байна.
