Монголын балетын хөгжил сангаас жил бүр П.И.Чайковскийн “Цөмөөхэй” (The Nutcracker) балетыг сонгодог урлаг сонирхогчид болон бяцхан үзэгчдэдээ толилуулдаг. Өнөө жилийн “Цөмөөхэй” балетыг арванхоёрдугаар сарын 12, 13, 28, 29, 30-нд Соёлын төв өргөөнд тоглоно.
Хамгийн сонирхолтой нь, хамгийн сүүлийн буюу арванхоёрдугаар сарын 30-ны тоглолтод балетын гол дүрүүдийн нэг Дросселмайерын дүрд Гавьяат жүжигчин, балетчин Д.Алтанхуяг өөрөө тоглох аж.
Хөгжим бүжгийн коллеж, АНУ-ын “School of American Ballet” сургуульд мэргэжлээ эзэмшсэн Гавьяат жүжигчин, балетчин Д.Алтанхуягийг балетын урлагт шимтэгсэд П.И.Чайковскийн “Хунт нуур” балетын ханхүү Зигфрид, “Щелкунчик” балетын Цөмөөхэй, “Нойрсож буй гүнж” балетын ханхүү Дезире, “Жизель” балетын Альберт, “Ромео Жульетта” балетын Ромео, “Дон Кихот” балетын гол дүрүүдийг бүтээснээр нь андахгүй. Тэрбээр УДБЭТ-аас гадна Японы “Асами Маки”, “Комаки балет” компани, АНУ-ын “Бостон балет” компанийн гоцлол бүжигчнээр ажиллаж, Италийн “Ла Скала” театрын хүндэт бүжигчнээр тодорч байв.
2010 оноос Д.Алтанхуяг “Монголын балетын хөгжил сан”-г байгуулж, тэргүүнээр нь ажиллаж эхэлсэн бөгөөд залуу бүжигчдийг дэмжих, балетын урлагийг хүүхэд, залуучуудад түгээн дэлгэрүүлэхэд анхаарч иржээ. 2014 онд Гавьяат жүжигчин Д.Алтанхуяг Германы зохиолч Эрнст Теодор Амадей Хоффманы 1816 онд хэвлэгдсэн “Цөмөөхэй ба хулганы хаан” үлгэрээс сэдэвлэж, хөгжмийн зохиолч Пётр Ильич Чайковскийн хөгжмийг нь бичсэн “Цөмөөхэй” бүтээлийг шинэчлэн найруулж, Монголын балетын хөгжил сангийн дэмжлэгтэйгээр дахин тайзнаа амилуулж, түүнээс хойш жил бүр толилуулж буй.
