Шилдэг хөгжмийн зохиолч, хөгжмийг тодруулдаг “Алтан намар” наадмыг энэ жил өнжүүлэх болсон нь уран бүтээлчдийг дэндүү гомдоосон хэрэг болов. Тэд уяа сойлго нь таарсан морьд шиг “Алтаннамар” наадмаа хоног тоолон, хуруу даран хүлээдэг болохоор арга ч үгүй биз.
Энэ наадмыг тэмдэглэхгүй болсон нь хөгжмийн зохиолчдын төдийгүй хөгжимчдийн хөгжмийн чавхдасыг нь тасалж орхисонтой утга нэг гэхэд хол зөрөхгүй биз. Уг нь энэ наадамд дуунаас бусад бүх салбарын тухайлбал, сонгодог урлаг, ардын хөгжим, цөөхүүл хөгжим, эстрад, найрал гэх зэргээр бүх хөгжим ордог юм шүүдээ. Тэртээ 1982 онданх зохион байгуулагдсаар 32 дахь жилийнхээ босгон дээр ийн өвдөг шороодсон шалтгаан нь тун хөгийн. Өнөө л хөрөнгө санхүүгийн асуудал. Энэ жил 50 орчим сая төгрөгийн санхүүжилттэй байсан тус наадамд Засгийн газраас санхүүжилт өгөхгүй гэсэн шийдвэр гаргасан гэдгийг эх сурвалжууд хэлсэн юм. Уг нь жил бүр 50 гаруй хөгжмийн зохиолч оролцож, урлагийн салбарын бүх шилдэг хөгжмийн аялгууг шалгаруулдаг энэ наадмыг гадаад улс орнууд ч чих тавин хүлээдэг.
Манай улсын урлагийн салбарт киночдын “Academy awards”, драмынхны “Гэгээн Муза”, хөгжимчдийн гээд томоохон олон наадам шил шилээ даран болдог шүү дээ. “Алтан намар” наадмыг ийн өжөөх болсон нь өнгөц харахад хөрөнгө санхүүгийн асуудлаас болоод ганц нэг жил өнжиж байгаа мэт боловч нидэр дээрээ Монгол Улсын урлагийг уруудах зам руу нь хөтөлж буйн нэг илрэл юм. Урлаг уруудах нь улс орон мөхөхийн дохио гэж нэгэн суутан хэлж нэлээн хэдэн алдартнууд үүнийг баталсан байдаг шүү дээ. Хөгжмийн “Алтан намар” наадам өнжих нь гэх яриа гарсантай зэрэгцээд Соёл, спорт аялал жуулчлалын сайд Ц.Оюунгэрэлтэй холбоотой олон асуудал яригдаж болзошгүй болоод байгаа тухай амтай болгон нь ярьж байна.
Тухайлбал, “Батаараас өөрийг мэдэхгүй сайдыг соливол таарна”, “Яаманд урлагийн ганц ч мэргэжилтэн байдаггүйн тод бөгөөд эмгэнэлт жишээ энэ”, “Хөгжмийн хэмнэл мэддэггүй хүн яам удирдахаар ийм байдаг юм”, Ар өврийн хаалгаар авсан, идсэн нөхөд нь батаар хэмээх араг ясанд аль байдгаа зарцуулсан болоод тэр” гэх мэтээр элдэв эрээн бараан үгс эх адаггүй хөвөрсөөр байна. Энд тэндхийн чуулга, театрын үүдийг татаад ороход эх адаг нь үл мэдэгдэх ийм яриа сүүлийн хэдэн өдөр өрнөсөөр л.
Уламжлалт наадмынхаа амыг барьсан Засгийн газрын тогтоол чухам хэзээ гарчихсан нь ч бас олны анхаарлыг татаж байгаа бололтой.
Татахаас ч аргагүй. Яг одоо Засгийн газраа хэрхэн бүрдүүлэхийг ард түмэн чих тавин хүлээж байгаа шүү дээ, уг нь. Тэгэхээр хэн, хэзээ гаргасан тогтоол юм бол.
Эх сурвалж: "ӨГЛӨӨНИЙ СОНИН"
