Поп акапелла урсгалаар уран бүтээлээ туурвидаг “S4” хамтлагийн залуус Өвөрмонгол болон Хятадад алдартай “Эргүна” хамтлагтай хамтарсан бэлтгэл хийжээ. Учир нь “S4” хамтлагийнхан өнөөдөр болох “Эргүна” хамтлагийн тоглолтонд урилгаар оролцож ая дуугаа өргөх юм. Өвөрмонголын үндэсний хамтлаг “Эргүна” 2001 онд байгуулагдсанаасаа хойш өнөөдрийг хүртэл тасралтгүй уран бүтээлээ туурвисаар яваа. “S4” хамтлагийнхан “Эргүна” хамтлагийн тоглолтонд урилгаар оролцож байгаа бөгөөд өөрсдийн уран бүтээлээсээ хүргэхээс гадна тус хамтлагтай хамтран дуулах нь ээ.
Тэд энэ сарын 22-ноос эхлэн Бээжин хотноо хамтарсан бэлтгэлийг эхлүүлсэн бөгөөд “Эргүна” хамтлагийн тоглолт энэ сарын 28, 30-нд Хөх хотын Спортын ордонд болох юм. Хамтлаг гитарчин, басс гитарчин, бөмбөрчин, дуучин гэсэн дөрвөн хүнээс бүрддэг. 2001 онд монгол хэл дээр анхны “Erguna band” цомгоо гаргаж байжээ. Харин 2006 онд Хятад хэл дээр “wild goose”, 2009 онд хятад, монгол хэл дээр “Memories” нэртэй цомогоо гаргаж байна. Тус хамтлаг нийт таван цомогтой бөгөөд Хятадаас Австрид уригдаж тоглосон анхны Өвөрмонгол хамтлаг аж. “Эргүна” хамтлагийн 10 жилийн ой 2011 онд тохиож тэд ойгоороо Хятадын Тяньжин, Үрэмч, Бугат зэрэг хэд хэдэн хотод аялан тоглолт хийжээ.
“Эргүна” хамтлагийн тоглолтонд тэдний хуучны хит дуунуудас гадна 2014 онд гаргасан шинэ уран бүтээлүүд дуулах юм байна. Харин “S4” хамтлагийн хувьд тоглолтын бэлтгэлийн хажуугаар хоёр ч шинэ клипны зураг авалтаа Бээжин хотноо хийж байгаа бөгөөд ирэх сарын дундуур үзэгчидийн хүртээл болгохоор төлөвлөжээ. Тэдний хувьд хөгжмийн зохиолч Б.Чинбатын “Оne music” продакшинд харьяалагддаг бөгөөд хамгийн сүүлд “Нар минь байг” дуугаа гаргасан юм. Тэгвэл тэд уг дууны клипны зарим зургийг Бээжин хотноо авч байгаа юм байна. Түүчлэн ирэх сард хэд хэдэн ковер уран бүтээл хүргэхээр төлөвлөжээ. Өмнө нь “Sweetymotion” хамтлагийн О.Ганболортой хамтран “A Great Big World”, Christina Aguilera нарын хамтран дуулсан "Say Something” хэмээх уран бүтээлийг “A capella” хэлбрээр дуулж хүргэсэн юм. Түүнчлэн Daft Funk, Pharrel Willams-ийн “Нappy” дууг өөрсдийнхөөрөө коверлон хүргэсэн юм.