Монголчууд циркийн урлагт хайртай

    Монголчууд циркийн урлагт үнэхээр хайртай, дуртай нь дахин нотлогдож байна. Хоёр жилийн өмнө "Дэлхийн цирк Монголд" тоглолтын тасалбарыг худалдан авах гэсэн иргэд циркийн гадна урт дараалал үүсгэж, долоо хоног тоглох байсан хөтөлбөрийг дахин долоо хоногоор сунгуулж байсан. Хөхрөлдөөнд хөдөлдөггүй хөх асартаа зочлон араатан амьтан хэрхэн сургагчийнхаа гарын аясаар эрхлэн, тоглож, санаанд багтамгүй үзүүлбэр хийж байгааг харж, илбэчдийн ур ухааныг биширч, гайхамшигт акробатчдын дүүлэн нисэхийг шимтэн үзэхийг хүсдэг энэ хүсэл өдгөө ч хэвээрээ аж. Гуравхан хоногийн өмнө "Дэлхийн цирк Монголд-2015" тоглолтын тасалбар худалдаанд гарсан бол эхний дөрвөн өдрийн тоглолтын тасалбар хэдийнэ дуусчээ. 

    Гуравдугаар сарын 23-наас эхлэн циркийн үзэгчдийн суудал дүүрч, харин манежинд нь циркийн урлагийн хаан үзүүлбэр "Агаарын нисэлт", "Үхлийн цагариг" амилж дуулиан шуугиантай долоон хоногийг үдэх нь ээ. Мөн хамгийн гайхамшигтай нь дэлхийн циркийн амжилтыг эвдэж, олон улсын тэмцээнээс шагнал хүртсэн эдгээр жүжигчдийн дунд Монголын жүжигчид ч багтсан байгаа.

   Тухайлбал өнгөрсөн жил шидэх банзнаас үсэрч агаарт зургаан удаа эргэсэн амжилтаараа Соёлын тэргүүний ажилтан цол тэмдэг хүртсэн Т.Номуунбаатар болон түүний хамтлагийнхан энэ тоглолтыг чимэх юм. Тэд саяхан эх орондоо ирсэн бөгөөд Швейцарийн "Салто Натали" циркт тоглолт хийгээд ирсэн билээ.