2015 оны 3 дугаар сарын 3-8-ны өдрүүдэд ХБНГУ-ын Берлин хотноо дэлхийн аялал жуулчлалын салбарын хамгийн том нэгдсэн арга хэмжээ болох И-Ти-Би–Берлин 2015 (ITB Berlin 2015) үзэсгэлэн зохион байгуулагдсан билээ. Уг үзэсгэлэнд манай улс жил бүр тасралтгүй оролцож ирсэн ба 2015 оны хувьд Түнш орны онцгой статустайгаар оролцжээ.
Манай улс үзэсгэлэнд “албан ёсны түнш статустай” оролцсоноор нээлтийн үйл ажиллагааг нээж, хурал, гала концерт болон Монгол Улсын соёл, зан заншлыг харуулсан хүлээн авалт зохион байгуулж, аялал жуулчлалын мэргэжлийн хурал чуулган, дугуй ширээний ярилцлага зэрэг Монгол Улсыг сурталчлан таниулсан томоохон арга хэмжээ, уулзалтыг зохион байгуулсан байна.
Энэхүү үзэсгэлэнд Улсын Филармонийн Морин хуурын чуулга оролцоод иржээ. Морин хуурын чуулга нь германы хэвлэл мэдээллийн хэрэгсэл болон олон нийтийн сүлжээгээр дамжуулан урлагийн тоглолтоо хүргэсэн байна.
Морин хуурын чуулгын уран бүтээлчид 2015 оны 03 сарын 13-ны өглөө эх орондоо ирсэн бөгөөд удахгүй тоглогдох “Ардын хөгжимд зориулсан концертууд” тоглолтын бэлтгэлдээ ороод байгаа ажээ. Тус тоглолтонд монголын хөгжмийн зохиолчдын ардын хөгжимд зориулсан бичсэн шилдэг бүтээлүүд тоглогдох юм. Тоглолт 2015 оны 03-р сарын 19-ний 19:00 цагт Улсын филармонийн тайзнаа ганцхан удаа болно.
Тасалбарыг улсын Филармонийн кассаар болон 1900-1617 үнэгүй хүргэж өгөхөөс гадна дэлгэрэнгүй мэдээллийг 7011-8012, 7014-8012, 99925074 утсаар холбогдон мөн https://www.facebook.com/pages/Mongolian-State-Philharmonic/ хуудсаас авах боломжтой юм.
Монгол түмний итгэлийн баясгалан
Морин хуур эгшиглэх ариун өргөөнд саатан морилохыг урьж байна.
