Монголын хос дуучид гэхээр зууны манлай дуучин С.Вандан, Д.Дуламсүрэн гэгчлэн жагсаалт хөвөрдөг. Харин тэднийг уран бүтээлээ түр завсарласан байх 90-ээд оны эхээр “Би эндээс явахгүй” уран сайханы кино “мода” болж, тус киноны дуу болох Сэтгэлийн үг хэмээх уран бүтээл киноноосоо ч илүү үзэгчдийн сэтгэлд хүрч, удаан хугацаанд хит болон, олны ам дамжин аялагдаж байсан түүхтэй.
Түүх сөхсөн учир гэвэл энэ дууг дуулж амьдруулсан хос дуучдын тухай юм. МУГЖ У.Далантай, С.Эрдэнэцэцэг нар залуу халуухан, хийж бүтээх их хүсэл мөрөөдлөөр урлагийн ертөнцөд “Сэтгэлийн үг” дуугаар олонд танигдаж, тухайн үеийн анхны нийтийн дууны дүрстэй клипийг хийж ёстой л шуугиулж байсан удаатай. Харин хоёр дуучны талаар тухайн үед хөгжиж байсан шар хэвлэлээр элдэв таагүй мэдээллүүд ар араасаа гарснаар тус тусын уран бүтээлийг туурвиж 20 гаруй жил дууны уран бүтээлдээ 2 талд үнэнчээр зүтгэжээ. Энэ хугацаанд тэдний дуулж амьдруулсан олон дуунуудыг нийтийн дууны нэгэн үеийнхэн дуулж амьдруулж, олонд танигдсан удаатай.
МУ-ын Ерөнхийлөгчийн зарлигаар У.Далантай 2004 онд гавьяат, С.Эрдэнэцэцэг 2005 тонд гавьяат болжээ. Хоршин дуулж уран бүтээлээ эхлүүлсэн хоёр гавьяатайг ард олны сэтгэлд хоногшсон дуунуудаа хэзээ нэг хамтран дуулж, тухай үеийн олон үзэгчдийн сонорыг мялаах бол гэлцэх яриа хааяа сонсогддог байлаа. Харин энэ онд тэд нийлж үзэгч түмнээ тэртээх 1990-ээд он хөтөлжээ. “Сэтгэлийн үг”, “Сэтгэлийн булаг” дуунуудаа дахин амьдруулж, шинэ жанр, хөгжмийн найруулгатай дуулсан дуучид 8 хос дуутай цомгоо өлгийдөн авч байгаа бөгөөд ирэх дөрөвдүгээр сарын 1-нд Hi-Fi рекордст 12,00 цагаас сонсогчидтойгоо цомгийн баяраа тэмдэглэх гэнэ. Эхний 50 азтан гавьяатуудын цомгийг бэлгэнд авч, сэтгэлд хоногшсон сайхан дуунуудыг нь амьдаар сонсож, цомгийн баярт оролцох боломжтой гэнэ. Харин шинээр амьдруулсан “Сэтгэлийн булаг”, “Сэтгэлийн үг” дуунуудыг дараах линкээр шууд үзэж болно.
