Э.Чойдог “Чойжид Дагина” балет энэ сарын 22-нд тоглогдоно

УДБЭТ-ын уран бүтээлчид энэ сарын 22-ны өдөр алдарт Э.Чойдог "Чойжид Дагина" балетыг тавихаар болсон болжээ. Тус балетын  Чойжид дагинын дүрийг МУГЖ Г.Цолмон амилуулсан бол Бурханы элч М.Намсрай,  Эрлэг Номун хааны элч –  А.Билгүдэ бүтээжээ. Мөн  УДБЭТ-ын балетын жүжигчид оролцон тоглож, симфони найрал хөгжим хөгжимдөх ажээ.  

36 настай Чойжид хэмээх эмэгтэй өвчиндөө шаналан бурханаас аврал гуйна. Гэнэт түүний бие сайжирч баясан бүжиглэж байснаа дахин муудаж үхэтхийн унаж, насан эцэслэнэ. Энэ үед түүний хоёр талд хар хувцаст Эрлэг Номун хааны элч, цагаан хувцаст бурхны элч нар сүнсийг авч одохоор булаацалдан байна.

Бурхны дүр гэнэт тодрон уул эмэгтэйн сүнсийг Чойжид хэмээх Дагина болгон тамын оронд аваачиж нүгэл үйлдсэн хүмүүс хэрхэн зовон шаналж байгааг харуулан, Эрлэг Номун хааны ордны сүр хүчийг үзүүлэн Бурхны орон руу илгээнэ. Бурханы орон Бурхад, Дарь-Эх, Дагинасууд мөргөлийн бүжиг хийж байх үед Чойжид Дагина хүрэлцэн ирнэ. Энд буян үйлдсэн хүмүүсийн  жаргалант амьдралыг үзэж тэдэнтэй хамтран  бүжиглэж жаргал цэнгэлийг биеэр мэдэрнэ. Бурхад түүнд хүн төрөлхтөнд нүгэл буяны ялгааг ойлгуулан тайлбарлаж өгөх зарлигийг буулгаж эх дэлхийд нь буцаана.

www.Urlag.mn