Уран бүтээлч Л.Мянганцэцэгийн “Зүрхний хэргүүд…” уран бүтээлийн бие даасан үзэсгэлэн МУЗ-н “Улаан гэр” арт галерейн үзэсгэлэнгийн танхимд 2015 оны 04 сарын 03-11-ны хооронд дэлгэгдэх гэж байна.
Уран бүтээлч Л.Мянганцэцэг нь 2009 онд СУИС-н харъяа Дүрслэх Урлагийн сургуулийг Уран дарханы урланд суралцаж төгссөн бөгөөд төгссөнөөсөө хойш урлагт зүрх сэтгэлээ өгч бүтээлээ тасралтгүй туурвиж яваа залуу уран бүтээлч юм.
Энэхүү үзэсгэлэн нь түүний анхны бие даасан үзэсгэлэн бөгөөд үзэсгэлэнд нийт 13 ширхэг зураг, 1 ширхэг инстолляц тавигдана. Мөн “Зүрхний хэргүүд” нэртэй өөрийн бичсэн нийт 200 гаруй шүлгээс бүтсэн шүлгийн түүвэр номны нээлтийг үзэсгэлэнгийн нээлтийн өдөр буюу 2015.04.03-ны 18:00 цагт хамт хийх юм.
Үзэсгэлэнд тавигдах бүтээлүүд нь “Зүрхний хэргүүд” номонд бичигдсэн шүлгүүдэд зориулагдан зурагдсан бөгөөд холимог техникийн аргаар бүтээлүүдээ туурвисан.
Тэрээр уг үзэсгэлэнгээрээ “Бид өөрсдийн гар дээрээ тавиад харж үзээгүй зүрх сэтгэл гэдэг зүйлийн тухай цаг ямагт маш сайн мэддэг мэт яридаг хэдий ч хүний өрцөн цаана байдаг атгахан зүрх 1,2,3…400,1000-н ч хүнийг зэрэг хайрлах чадалтай, үлгэр сонсож өдөлсөн үнэн сэтгэл гэдэг зүйлийг бид нас нэмэх тоолонд мартаж өөрсдөө хойч үедээ үлгэр яригсад болон хувирч байгааг ойлгуулах, зүрх гээч эрхтэн сэтгэлд захирагдахгүйгээр хэндэнтэй маш хүчтэй дурлаж, хаягдаж, хаяж, хэн нэгнийг амьдруулж, хэн нэгнийг дотроо булшилж байдаг, хүн биеэр үйлдсэн гэмт хэрэгтээ ял хүлээдэг шиг зүрхний үйлдсэн энэ гэмт хэргүүдэд ял хүлээдэг байсан бол аль хэдийнээ цаазын ялыг маш олон хүн авчихсан байх байсан хэмээх сэдлийг төрүүлэх, зүрх гэдэг эрхтэн сэтгэлд захирагддаггүй ч энэ хоёр салшгүй зүйл нь биедээ захирагдан хүний төгс төгөлдөрийн хэмжээс буюу ёс зүй гээчид мөнхөд захирагдан ирсэн тухай өгүүлэхийг зорив.
Үзэсгэлэн 2015.04.03 – 2015.04.10-ны өдрийг дуустал гарах бөгөөд үзэсгэлэн гарах хугацаанд үзэсгэлэнгийн ерөнхий санаа агуулагатай холбоотой үнэ төлбөргүй лекцийг зохион байгуулах гэж байна.
Уг үзэсгэлэн 2015 оны 04 сарын 03-аас 11-ны хооронд дэлгэгдэх бөгөөд дэлгэрэнгүй мэдээллийг 88064414 дугаараас лавлана уу
www.urlag.mn
