Монголчууд Зууны манлай дуучин, МУГЖ Б.Сарантуяагийн төрсөн өдрийг андахгүй, тоглолтыг нь алгасдаггүй. Өдгөө уламжлал болсон төрсөн өдрийн тоглолт хийх санааг анх ая зохиогч, продюсер Б.Ангирмаа найз нь санаачилж байжээ. Харин ес дэх удаагийн төрсөн өдрийн тоглолтоо “Сэхүүн салхи” хэмээн нэрлэж, 4 дүгээр сарын 20-нд буюу нэг дэхь өдөр Монгол Бөхийн өргөөнд хийхээр товлосон билээ.
Энэ жилийн тоглолтонд, дуучид, хөгжимчид, бүжигчид, техникийн алба болон арын алба гээд мэргэжлийн өргөн баг бүрэлдэхүүн ажиллаж байна. Дашрамд, дуучин Б.Сарантуяа “Сэхүүн салхи” дуугаа “Ocean Grey” продакшны уран бүтээлчидтэй хамтран шинэчлэн туурвиж байгаа бөгөөд энэ удаагийн тоглолтын тайзнаа анх удаа дуулах юм байна. Мөн өдөр бүр 20:40 цагаас боловсрол телевизээр тоглолтын тухай реалити шоу гарч байгаа юм байна.
Ер нь жил бүрийн тоглолт нь үзэгчиддээ зориулсан гэнэтийн бэлгээр дүүрэн, олон фэнийг нь залуу нас, дурсамжийн ертөнцөөр аялуулж чаддаг. Энэ удаагийн тоглолт ч улам чанартай, үзүүштэй, мартагдашгүй болох биз ээ.
www.urlag.mn
