“Зорилготой залуу гэр бүл” нийгэмд үйлчлэх төрийн бус байгууллагын санаачилсан “Аз жаргалын эрэлд” бодит төсөл нэвтрүүлгийн уран сайхны зөвлөх Аси буюу Р.Алтансүхтэй нэвтрүүлгийн талаар цөөн хором ярилцлаа.
Сур: Аси ах “Аз жаргалын эрэлд” нэвтрүүлгийн уран сайхны зөвлөхөөр ажилласан. Нэвтрүүлгийн талаар ямар бодолтой байна? Ер нь хэр цаг үеэ олсон нэвтрүүлэг болсон бэ?
Р.Алтансүх: Ер нь бол “Аз жаргалын эрэлд” нэвтрүүлэг цаг үеэ олохийн хувьд яг оносон гэж бодож байгаа. Яагаад гэвэл Монголын залуу гэр бүлүүд, хоёр талаасаа сэтгэл нийлсэн, сайхан сайхан залуу гэр бүлүүд олон байна. Гэсэн ч хэдий ч өөрийн гэсэн орон гэргүй, байргүй, эсвэл аавындаа амьдардаг, эсвэл хадмындаа амьдардаг. Ер нь байрны үнэ харьцангуй гайгүй болж байна. Гэхдээ залуу хосуудын хувьд айхтар үнэтэй байна. Залуу гэр бүлийн аз жаргалтай сайхан амьдрах боломж нь орон байр. Залуу хос хамгийн эхэнд хайр сэтгэлээр, хоёрдугаар үр хүүхэд, гуравдугаарт мэдээж өөрийн гэсэн орон байрандаа байж байгаа тохиолдолд аз жаргалтай сайхан амьдарч чадна. Тэр утгаараа бид нар хуримтлал байхгүй гэсэн мөртлөө хийх хүсэлтэй залуу гэр бүлүүдийг оролцуулахаар ярилцсан. Нэг ч гэсэн залуу гэр бүлийг орон гэртэй болох юмсан гэж энэ нэвтрүүлгийг эхлүүлсэн байгаа.
Сур: Нэвтрүүлэг хийж байхад тулгамдаж байсан ямар асуудал гарсан бэ? Бас хосуудыг ямар шалгуураар сонгож авсан бол?
Р.Алтансүх: Энэ нэвтрүүлэг маань жилийн дөрвөн улиралд хийгдсэн. Өвөл, хавар, намар, зун гээд. Хосууд маань ажилтай учраас ажлаасаа чөлөө авах вэ, үр хүүхдээ хэнээр харуулах вэ гэсэн асуудлуудыг зохицуулсан. Зарим нэг нь ажлаасаа гарч нэвтрүүлэгтээ бүх анхаарлаа хандуулсан гэх мэт жишээний залуус маань нэвтрүүлэгтээ зүрх сэтгэлээ зориулж байгаа. Үүний үр дүнд ч гэсэн олон том компаниуд “Аз жаргалын эрэлд” нэвтрүүлгийг ивээн тэтгэсэн байгаа.
Сур: Хоёулаа яриагаа олон жилийн өмнөхийг сөхөж үргэлжлүүлье. Та өөрийн гэсэн байртай болохын тулд хэрхэн хөдөлмөрлөж байсан бэ?
Р.Алтансүх: Энэ бол маш хэцүү. Хэцүүг нь би мэддэг учраас энэ залуучуудад тусалъя гэдгийг дэмжиж, нэвтрүүлгийг санаачилсан. Яагаад гэвэл миний хувьд оюутан байхдаа гэр бүлийн амьдрал зохиосон. Оюутан байх үед чинь хоёулаа байр хөлсөлдөг байсан. Одоогийн үеийн ханштай харьцуулахад тухайн үед байрны хөлсний үнэ хямд байсан ч оюутан хүний хувьд маш их мөнгө байсан. Бидний үеийнхэн хоёр талаасаа чемоданаа барьж ирээд л амьдралаа босгосон шүү дээ. Тэр утгаараа өнөөгийн залуу гэр бүлийг зорилготой болгохыг хүссэн, амьдралынхаа төлөө зүтгэдэг тийм юмтай болгохын төлөө энэ төслийг хэрэгжүүлж байгаа.
Сур: Аси ах Монгол залуучуудыг ямар байгаасай гэж хүсдэг вэ?
Р.Алтансүх: Залуу гэр бүл бол хамгийн гол нь бие биенийгээ хайрлах хайр, тэгж байж бүх юм бүтнэ. Тэрнээс биш бүх юм бэлэн байгаа тохиолдолд амьдрал болдоггүй. Амьдралын саад бэрхшээлийг хамтдаа даван туулах сэтгэлийн хаттай байгаасай гэж хүсдэг. Нэвтрүүлэг хийж байхад залуу хосууд ярьж байгаа юм л даа. Бүтэн жилийн хугацаанд хоёулаа нэг юмны төлөө зүтгэж, бие биедээ улам их хайртай болж, биенийгээ ойлгож ойртуулж байна гэж ярьж байсан.
Сур: “Шинэ үе” продакшн сүүлийн үед ямар уран бүтээл дээр ажиллаж байгаа вэ?
Р.Алтансүх: Манай “Шинэ үе” продакшн энэ намрын анхны тоглолтондоо бэлдэж байгаа. Энэ наймдугаар сарын 20-ноос эхлэн МҮЭСТӨ-нд тоглогдож эхлэх гэж байна. Манайхан өдөр болгон бэлтгэлээ хийж байгаа.
Сур: Таны хувийн уран бүтээлийн ажилдаа орсон гэж сонссон. Ямар уран бүтээл дээр ажиллаж байгаа вэ?
Р.Алтансүх: Миний хувьд “Такси” гээд уран сайхны кино хийсэн. Энэ кино маань инээдмийн төрлөөр бүтээгдсэн. Наймдугаар сарын 26-нд нээлтээ хийхээр төлөвлөж байна.
Сур: За баярлалаа. Танд уран бүтээлийн өндөр амжилт хүсье.
Р.Алтансүх: За баярлалаа. Танай хамт олонд ажлын өндөр амжилт хүсье.
Эх сурвалж: Nuudel.mn
