Бүсгүй та хэрэглэсэн ууттай цайныхаа шаарыг хаях гэж бүү яараарай. Учир нь цайны шаарыг ахуйн нөхцөлд олон зүйлсэд ашиглаж болдог юм байна.
1. Хамгийн энгийн жишээ л гэхэд хаях гэж буй цайныхаа шаарыг уутнаас нь гаргаад, бага зэрэг усаар шингэлж байгаад цэцгээ услах юм. Харин дараагаар цайныхаа шаарыг цэцгийнхээ хөрстэй сайтар хольж өгснөөр энэ нь тасалгааны тань ургамлын өсөлтөд маш сайн нөлөөлөх бөгөөд дан ялангуяа залуу ургамлын өсөлтөд сайн байдаг байна.
2. Ууттай цайг гоо сайхны арчилгаанд ашиглаж болдог байна. Та бүлээн байгаа ууттай цайны шаараар нүдэндээ жин тавьж болох бөгөөд ингэж нүдэн дээрээ тавьснаар нүдний тань ядаргааг тайлахаас гадна зовхины үрчлээг багасгадаг аж. Түүнчлэн цайныхаа шаарыг уутнаас нь салгаж авч саванд хийгээд бага зэрэг ус хийж уусмал бэлтгээд нүүрээ угаахад нүүрний арьс цайрдаг байна.
3. Цайны шаарыг ахуйн цэвэрлэгээндээ буюу хивсээ цэвэрлэхэд ашиглаж болдог аж. Учир нь цайны шаар нь тоосыг өөртөө маш сайн татаж авдаг бөгөөд хивсийг өнгө оруулдаг байна. Тиймээс ч хэрвээ танд их хэмжээний цайны шаар байгаа бол цайныхаа шааруудыг уутнаас нь салгаад хивсэн дээрээ сайтар гэгч нь тараагаад цацаарай. Ингэснийхээ дараагаар цайныхаа шаарыг сойзоор сойздож аваад дараагаар нь тоос сорогчоор соруулахад хивсний тань өнгө сэргэдэг байна.
4. Дээрх аргуудаас гадна цайны шаарыг цэвэр даавуу болон сүлжмэл даавуун эдлэлүүдийг бор өнгийн будганд оруулахад ашиглаж болдог байна. Түүнчлэн бор өнгөтэй хувцасны тань будаг гандаад яахаа мэдэхгүй байгаа бол тухайн хувцсаа угаасныхаа дараагаар цайны шаартай бүлээн усанд 30 минут байлгахад л эргээд бор өнгөтэй болдог ажээ.