Их сургууль, дунд сургуульд яагаад мөнгө зөв зарцуулах тухай хичээл ордоггүй юм бол оо? Хэрвээ "Хувийн санхүү” гэсэн заавал авах ёстой хичээл байдаг байсан бол хүмүүс мөнгөө яаж зөв зарцуулах тухай мэдлэгтэй болох байлаа.
Олон хүмүүс залуу байхдаа хувийн санхүүгээ хэрхэн удирдах, хянах талаар суралцаагүй дээ харамсдаг.Их сургуульд зааж болох байсан ч заагаагүй 6 хичээлийг эндээс суралцаарай!
Хувийн төсвөө хөтөлж сурах.
Сурагчид дөнгөж оюутан болмогцоо л хувийн төсөв хөтөлж сурах хэрэгтэй.Орлого зарлагаа ингэж хянаж сурснаар залуучууд мөнгөндөө илүү хариуцлагатай ханддаг болж төлөвшинө.Ажилгүй, орлогогүй ч байсан хамаагүй орж гарч байгаа бүх мөнгөө бүртгэж сурснаар мөнгөтэй харьцаж сурдаг.
Банк санхүүгийн байгууллагатай харьцаж, үйлчлүүлж сурах.
Банк бол хүн бүрийн амьдралынхаа турш холбогддог байгууллага.Тиймээс банктай харилцаж зээл авах, зээлээ эргэн төлөх тал дээр хангалттай мэдлэгтэй болбол ирээдүйдээ хариуцлагатай шийдвэр гаргах болно.
Тэтгэврийн данстай болж хуримтлал үүсгэж сурах.
Ирээдүйдээ үргэлж анхаарч бэлтгэлтэй байх нь насанд хүрэгчдийн хувьд маш чухал.Хуримтлал үүсгэж тэтгэвэрт гарахдаа санхүүгийн бие даасан байдалтай байхын тулд аль болох эртнээс энэ тухай анхаарч мөнгөө хадгалж сурах хэрэгтэй.
Татварын тухай мэдлэгтэй болох.
Сургуулиа төгсөөд анх ажилд орон эхний цалингаа авахад хүмүүс хэдэн хувь нь татварт төлөгдөж байгааг мэдэхгүйгээс болж төсвөө буруу тооцоолж гайхшралд ордог.Оюутан бүрт эртнээс татварын талаар мэдлэг олговол тэд хувийн санхүүгээ илүү үр дүнтэй авч явах болно.
Хэрхэн өөрийгөө илэрхийлж ажлын ярилцлагад амжилттай орох талаар сурах.
Залуу боловсон хүчин үнэндээ яаж ажил хайх, хэрхэн CV гээ бэлдэх, ярилцлагад орохдоо яавал өөрийнхөө давуу талыг ойлгуулах, хэрхэн цалин хөлсөө тохирч гэрээгээ зөв хийх талаар асар бага мэдлэгтэй байдаг учир хүсээгүй ажилдаа бага цалинтайгаар ордог.Эдгээрийн талаар тэдэнд үнэн зөв, бодит мэдээлэл олгосноор сурсан боловсролоо зөвөөр ашиглах багаж өгсөнтэй адил.
Санхүүгээ зөв тооцоолбол зорилгодоо бодитоор хүрнэ
Амьдралдаа тавих зорилгууд чинь ямар нэгэн байдлаар санхүүтэй холбоотой л байх болно.Ирээдүйн санхүүгээ тооцоололгүйгээр сэтгэлийн хөдөлгөөнөөр үнэтэй байр, машин худалдаж авах зорилго тавих нь ирээдүйд хүнийг өрөнд унагаах том хөшүүрэг болдог.Тиймээс өөрийн санхүү нөхцөл байдалтай уялдуулан зорилгоо зөвөөр тодорхойлж сурах нь хүн бүхэнд хэрэгтэй.
