Бүгд Найрамдах Бүрэн эрхт
Ард монгол улсынхаа
Эр бяраараа тодорч
Түмэн бөхийн дотроос
Төгөлдөр чадлаараа шалгарч
Өргөн дэлхийн уудамд
Өршөөлт төрийн ивээлд
Өлзийт ялалтаа тэмдэглэх
Өргөн их наадамд
Хан гарди шиг дэвээд
Харцага шонхор шиг
Халин дүүлэн барилдаж
Хамаг олноо баярлуулагч
Өрнөн хөгжих хүчтэй
Өгөөмөр шинж нь бүрдсэн
Өршөөл ивээлээр тэтгэгдсэн
Өөдлөн барилдах НАЧИН
Улам ахин сайжрах
Улс даяар алдаршигч
Үнэхээр гойд шаламгай
Үеэс үед дурсагдах
Аз жавхаа нь бадарсан
Арслан барсын хүчтэй
Сэргэлэн түргэн хөдөлгөөнтэй
Сааршгүй зоригтой
Бардам гойд мэхтэй
Бүргэдийн хурц харцтай
Бүгдийн тольтыг хөдөлгөгч
Бууршгүй хүчит ЗААН
Хандгай бугын зоотой
Хан гардийн салхит дэвэлттэй
Үзэсгэлэн төгөлдөр шинжтэй
Үйлс жавхлан нь дэлгэрсэн
Түмний дундаас тодорсон
Тун ч илүү шандастай
Авхаалж хиймориороо жигдэрсэн
Алмааз эрдэнийн хатуужилтай
Биеийн хөгжлөөрөө гайхамшигтай
Бялдар цогц нь хэмжээлшгүй
Арга мэхээр хязгааргүй
Араатан ч халдашгүй АРСЛАН
Түмэн эрийн барилдаанд ч
Түдэлгүй түрүүлдэг
Түм олны дотроос
Тэргүүн сайны нь амладаг
Төрийн их наадамд
Тодрон шалгарч үлддэг
Бөхийн түрүүнд магнай
Бүхэнд үүрд дурсагдах
Хөх тэнгэрийн доорхи
Хүчээр төгс АВАРГА аа.
