Улаанбаатар /МОНЦАМЭ/. Монголын Үндэсний сэтгүүлзүй үүсэн байгуулагдсаны түүхт 104 жилийн тохиож байгаа энэ өдөр Чингис зочид буудлын Тэмүүжин танхимд “Сэтгүүлзүй – 104 жил” ёслолын ажиллагаа боллоо. Тэртээ 1913 оны гуравдугаар сарын 06-нд Монголын сэхээтнүүд “Шинэ толь хэмээх бичиг” сонины анхны дугаарыг гаргасан энэ өдрийг Монголын үндэсний сэтгүүлзүй үүссэн өдөр болгон жил бүр тэмдэглэх саналыг 1992 онд Монголын сэтгүүлчдийн холбооны VII Их хурлаас гаргаж, 2009 оноос хойш тогтмол тэмдэглэх болжээ.
Энэ жилийн ёслолыг манай улсын хэвлэл мэдээлэл, сэтгүүлзүйн мэргэжлийн удирдах төв байгууллага болох МСНЭ-ийн Ерөнхийлөгч Б.Галаарид нээсэн бөгөөд Үндэсний сэтгүүлзүйн 104 жилийн ойг тохиолдуулан тус салбарын хүндтэй ахмадууд болох МУСГЗ Б.Лигдэн, МУСГЗ Д.Дорждулам, МУСГЗ М.Шийрэв нарт “Алтан өргөмжлөл” хүртээж хүндэтгэл үзүүлэв.
Энэ үеэр 82 настай, ахмад сэтгүүлч Д.Дорждулам гуай үг хэлэхдээ, Би малын эмчээс сэтгүүл зүйн салбар луу орж ОХУ-ын Москвад суралцаж сэтгүүлч болсон хүн. Энэ мэргэжилдээ чин үнэнчээр өнөөг хүртэл 50 гаруй жил зүтгэж байна. Миний бие Москвад хоёр ч удаа сурвалжлагч, Латин Америк болон Куба улсад 4 жил сурвалжлагчаар тус тус ажиллаж байлаа. Залуу сурвалжлагч, сэтгүүлч та бүхэнд захиж хэлэхэд энэ мэргэжилдээ үнэнчээр зүтгэж, үзэг нь хурц байх болтугай” хэмээн онцолсон юм.
МСНЭ-ийн дээд шагналууд болох Ж.Цэвээн, Д.Бодоо, Ц.Намсрай, М.Цэрэнжамц нарын нэрэмжит шагналтай зэрэгцэн МОНЦАМЭ агентлагийн нэрэмжит “Алтан дүрмийн эзэн” мэдээний шилдэг сурвалжлагчийн шагнал 2016 оноос эхэлж тус агентлаг МСНЭ-тэй хамтарч шинээр бий болгосон юм. Уг шагналыг сэтгүүлзүйн амин сүнс болсон мэдээг орчин үеийн стандарт, шаардлага, зарчимд нийцүүлэн биечлэн бэлтгэдэг шилдгийн шилдэг сурвалжлагч нарт олгодог.
МОНЦАМЭ агентлагийн дарга, МУСГЗ Б.Ганчимэгтэй уулзаж түүний сэтгэгдлийг сонслоо. Тэрбээр, “Юуны өмнө энэ салбарт ажиллаж сайн, муу хэлүүлж байгаа Монголынхоо үе үеийн бүх сэтгүүлчиддээ Монголд мэргэжлийн сэтгүүлзүй үндэс сууриа тавьж, үүсч хөгжсөний 104 жилийн ойн баярын мэндийг хүргэе. Өнөөдөр Монголын сэтгүүлзүйн хувьд түүхэн тэмдэглэлт өдөр. Мэдээллийн ууган байгууллага МОНЦАМЭ агентлагийн нэрэмжит “Алтан дүрмийн эзэн”-ээр мэдээний шилдэг 3 сурвалжлагчийг бид жил бүр тодруулдаг уламжлалтай” гэв.
Энэ жил тус шагналын эзнээр 25-р суваг телевизийн сэтгүүлч Г.Мөнхтуул, iToim сайтын сэтгүүлч Г.Улсболд, гэрэл зургийн сэтгүүлч Б.Бямба-Очир нар тус тус тодорч шагналаа гардан авсан юм.
Энэ үеэр iToim сайтын сэтгүүлч Г.Улсболдын сэтгэгдлийг авлаа. “Хэвлэл мэдээллийн ууган байгууллагын нэг МОНЦАМЭ агентлагийн нэрэмжит шагнал “Алтан дүрмийн эзэн” болсондоо баяртай байна. Би МУБИС-ийг сэтгүүлч мэргэжлээр 2011 онд төгссөн. 2010 оноос “Үндэсний шуудан” сонинд мэдээний сурвалжлагч болж мэдээ бичиж эхэлж байлаа. Шуурхай мэдээллийн эх сурвалжаа олж авах гэдэг нэн чухал байдаг. Мэдээ бол сэтгүүл зүйн анхдагч нь төдийгүй сэтгүүлчийн ур чадвар, мэдрэмжийг илэрхийлдэг” хэмээн ярьж байв.
Энэхүү ёслолын үеэр МСНЭ-ийн дээд шагналаар зарим сэтгүүлчдийг шагнасан бөгөөд Зохиолч, нийтлэлч С.Лочинг МСНЭ-ийн дээд шагнал Ж.Цэвээний нэрэмжит шагналаар, доктор, профессор До.Цэнджавыг МСНЭ-ийн дээд шагнал Д.Бодоогийн нэрэмжит шагналаар, сэтгүүлч Н.Лутбаярыг МСНЭ-ийн нэрэмжит шагналаар тус тус шагналаа.
Мөн 2012 оноос хойш уламжлал болгон зохион байгуулж буй сэтгүүлзүйн анхдагчдыг батламжлах ажлын хүрээнд сэтгүүлч Ж.Нэргүйг “Монгол Улсын хэвлэлийн анхны төлөөлөгч” мөн болохыг батламжилсан батламж гардуулсан юм.
Д.ӨЛЗИЙ
ЭХ СУРВАЛЖ: WWW.MONTSAME.MN
