УДЭТ-ын уран бүтээлчид “Улсын драмын эрдмийн театрын өдрүүд” аялан тоглолтынхоо хүрээнд “Гамлет”, “Царцаа намжил” жүжгээ Дорнод аймгийн Чойбалсангаас ирэх дөрөвдүгээр сарын 21-23-нд, Дархан-Уулд 28, 29-нд “Царцаа намжил”, “Жаргаагүй нар”-ыг тоглох гэж байна.
Түүнчлэн олон улсын театрын баярын өдрийг тохиолдуулан Дорнод Сибирын Соёл урлагийн их сургуулийн профессор, ОХУ-ын болон Буриад Улсын гавьяат жүжигчин, төрийн шагналт, “Алтан маск” наадмын шагналт, найруулагч Бадагаева Туяна манай улсад хүрэлцэн ирж, “Орчин үеийн театрын өнөөгийн байдал, цаашдын чиг хандлага”, “Театрын судлал, шүүмжлэл” сэдвээр сургалт зохион байгуулах гэнэ. Мөн ОХУ-ын гавьяат жүжигчин, Буриад Улсын ардын жүжигчин, төрийн шагналт Сультимов Доржо Норбосампилович УДЭТ-ын уран бүтээлчидтэй туршлага солилцох юм байна.
Аялан тоглолтоор дээрхи жүжгүүдийг 50 хувийн хөнгөлөлттэйгээр олон нийтийн хүртээл болгох аж. Харин “Театр үзэгч” хөтөлбөрийн хүрээнд “Сонгодог жүжиг миний ертөнцөөр” илтгэл, “Царцаа намжил-Үлгэрч хүүхэд” уралдааныг БСШУСЯ, Нийслэлийн боловсролын газар, СУИС-тай хамтран ЕБС-ийн сурагчдийн дунд зарлажээ. Шалгаруулалт ирэх дөрөвдүгээр сард явагдана.
