Хотоо цэвэр байлгах гэсэн хүсэлтэй залуус санаачилга гаргаж, өөрсдөө хогоо цэвэрлэхээр шийджээ. Энэ санаачилгыг Э.Ивээлсайхан, Д.Ууганбаяр, Э.Оюунболд нар фейсбүүк хуудсаар хэлэлцүүлэг өрнүүлж гаргасан байна. Тэд "Хоггүй хот-2012" аян зохион байгуулж "Сайхан хотод амьдаръя" уриан дор өнгөрөгч амралтын өдрүүдэд хотын зарим хэсгийг хогноос нь салгав. Тэд фейсбүүк хуудсаар залууст хандан сайн дураараа энэ цэвэрлэгээнд оролцохыг уриалсан байна. Цэвэрлэгээнд оролцохоор 10 гаруй залуу ирсэн аж. Эдгээр залуу Эрх чөлөөний талбайгаас Гандан болон III, VI дүгээр хорооллын эцсийн буудал хүртэлх хашаа, самбар дээр наасан, хуучирч навсайсан зар, сурталчилгааны хуудсыг хуулан ойр орчмынх нь хогийг цэвэрлэсэн аж. Түүнчлэн Нийслэлийн нутгийн зөвлөл болон Баянгол дүүргийн ТҮК тэднийг дэмжин ажилласан байна. Тэдэнд "Зиг заг" ХХК-ийнхан цэвэрлэгээний хэрэгсэл, бүтээгдэхүүнээсээ өгчээ.
Л.АЛТАН
