Өдгөөгөөс 15 жилийн өмнө анх байгуулагдаж, богино хугацаанд ард түмэнд танигдсан чанартай, чансаатай уран бүтээлүүдийн эзэн болсон хамтлаг бол Номинталст юм. Батсүх, Хаянхярваа, Дэлгэрмөрөн, Хангэрэл гэх дөрвөн гишүүнтэй тус хамтлаг байгуулагдсан даруйдаа ёстой л нэг залуусыг байлдан дагуулж байлаа. Тэдний хийсэн уран бүтээл зөвхөн залуу үеийг гэлтгүй үе үеийнхэний дуулах, сонсох дуртай дуунууд байсан юм. Харин сүүлийн жилүүдэд “Номинталст”-чууд тус тусын ажил, амьдралд анхаарлаа хандуулах болсоноор үзэгч фэнүүдээ хүлээлтэд оруулаад байсан юм. Тэгвэл энэ жил тэд хамтлагийнхаа 15 жилийн ойг тохиолдуулан Улаанбаатарыг доргиосон нижгэр тоглолт хийж фэнүүдийнхээ “цангааг” тайлахаар бэлтгэл ажилдаа оржээ. Тэдний тоглолт ирэх есдүгээр сард болох бөгөөд хамтлагийн продюссер, гитарчин Өөжгий буюу Өлзий-Орших уг тоглолтын бүхий л найруулгыг гардан хийж байгаа аж.
Г.Мөрөн
