“Aerosmith” хамтлагийн дуучин Стивен Тайлерын эсрэг гаргасан нэхэмжлэлийн хэргийн шүүх хурал эхлэхээс хоёр долоо хоног хүрэхгүй хугацааны өмнө шүүгч нь солигдохоор болжээ. Хэргийг хариуцаж байсан Лос-Анжелесийн дээд шүүхийн шүүгч Патрисия А.Янг есдүгээр сарын 15-нд болсон хурлын үеэр уг хэргийг цаашид хэлэлцэхээс татгалзсан байна. Ингэснээр хэргийг өөр шүүгчид шилжүүлэхээр болжээ.
Шинэ шүүгчийг томилох болон хэргийн цаашдын хуваарийг хэлэлцэхээр талууд есдүгээр сарын 18-нд шүүхэд дахин цуглах юм. Харин тангарагтны шүүхийн хурал есдүгээр сарын 28-нд эхлэхээр товлогдсон хэвээр байна.
Стивен Тайлерыг буруутган нэхэмжлэл гаргасан Жулиа Мисли 2022 оны арванхоёрдугаар сард өөрийг нь өсвөр насанд байхад бэлгийн хүчирхийлэл үйлдсэн гэх үндэслэлээр шүүхэд хандсан. Харин Стивен Тайлер уг буруутгалыг няцааж, тэдний харилцаа харилцан зөвшөөрсөн шинжтэй байсан гэж мэдэгдсэн байна.
Уг хэргийн явцад Мислигийн гаргасан нэхэмжлэлийн ихэнх хэсгийг хэрэгсэхгүй болгосон бөгөөд одоогоор нэг удаагийн үйл явдалтай холбоотой санаатайгаар сэтгэл санааны хохирол учруулсан гэх нэхэмжлэлийг шүүхээр хэлэлцэхээр үлджээ.
Хэргийн тангарагтны шүүхийн ажиллагаа товлосон хугацаандаа эхлэх эсэх нь шинэ шүүгч томилогдсоны дараах есдүгээр сарын 18-ны хурлаар тодорхой болох юм.
